Autoritetet komunale të Vitisë, zyrtarë të lartë policor, pjesëtarë të KFOR-it amerikan dhe përfaqësues të shoqërisë civile, kanë vendosur kurora lulesh tek busti i ambasadorit Richard Holbrook në Viti, për të nderuar viktimat e sulmit terrorist të 11 shtatorit të vitit 2001, të ndodhur në kullat binjake në New York të SHBA-ve, ku humbën jetën civilë të pafajshëm.
Me këtë rast, viktimat e këtyre sulmeve terroriste, u nderuan me një minutë hestje .
“Jemi këtu, së bashku për të përkujtuar dhe për të nderuar shtetin tonë aleatë, që gjatë gjithë historisë ishte në përkrahje të popullit të Kosovës dhe në veçanti gjatë viteve më të vështira të luftës 1998-1999, dhe po vazhdojnë të ndihmojë në ngritjen e shtetit të Kosovës. I shprehim ngushëllimet më të sinqerta familjeve të viktimave dhe solidarizohemi me popullin amerikan. Falënderoj KFOR-in amerikan dhe Policinë e Kosovës që na janë bashkuar në këtë homazh. Do të jemi bashkë edhe në aktivitete, por edhe sfida tjera”, tha kryetari i komunës së Vitisë, Sokol Haliti.
Ndërkaq përfaqësuesit e KFOR-it amerikan, shprehën falenderim për mbështetje dhe organizimin e ngjarjeve të këtilla përkrahëse për popullin amerikan, në ditët si kjo që sjellin pikëllim tek familjarët që humbën më të dashurit e tyre. /2LONLINE.com/
