Ministri i Financave Bedri Hamza ka pritur sot në takim ambasadorin e Francës në Kosovë Didier Chabert, me të cilin diskutuan për bashkëpunimin ndërmjet dy vendeve.
Në këtë takim gjithashtu u diskutua për implementimin e Marrëveshjes për Hua në vlerën totale 66 milionë euro ndërmjet Qeverisë së Republikës së Kosovës dhe Qeverisë së Republikës së Francës, për financimin e Projektit të trajtimit të ujërave të zeza në Komunën e Prishtinës, Fushë-Kosovës dhe Obiliqit. Të dy palët u zotuan për të realizuar këtë projekt si storie e suksesit e cila do të nxit përfshirje më të madhe të kompanive franceze në Kosovë.
Me këtë rast, Ministri Hamza duke vlerësuar lartë ndihmën gjithëpërfshirëse të shtetit të Francës për Kosovën, shprehi gatishmërinë e tij për vazhdimin dhe thellimin e mëtutjeshëm të bashkëpunimit ndër institucional. Në këtë kuadër ata u pajtuan për të organizuar vizita të ndërsjella të bizneseve të të dy vendeve.
Ministri Hamza gjithashtu e njoftoi ambasadorin Didier Chabert për prioritetet e Ministrisë së Financave dhe për hapat e ardhshëm që do të ndërmerr, si dhe ndër të tjera e njoftoi atë edhe për prioritet e Qeverisë dhe planin e adresimit të sfidave në fushën e ekonomisë për ruajtjen e rritjes ekonomike dhe ruajtjen e indikatorëve makro fiskal, si dhe për përkushtimin në fuqizimin e sektorit privat si bartës të rritjes ekonomike në vend.
Ndërsa, ambasadori francez Didier Chabert shprehi gatishmërinë e tij dhe të shtetit për vazhdimin e bashkëpunimit dhe ndihmës me Ministrinë e Financave, në fushat të cilat ofrojnë zhvillim dhe qëndrueshmëri makro-fiskale për Kosovën.
