Australiani Brenton Tarrant, 28 vjeç, u ngarkua me 50 akuza për vrasje dhe 39 akuza për tentim-vrasje, që lidhen me sulmet në qytetin Kristçërç të Zelandës së Re.
I dyshuari kryesor i sulmeve, Tarrant, i vetëpërshkruar si supremacist i bardhë, do të paraqitet në Gjykatën e Lartë të Kristçërçit më 5 prill, përmes një video-lidhjeje nga qyteti Auklland. Pesëdhjetë njerëz u vranë dhe 48 u plagosën nga të shtënat masive në dy xhami, më 15 mars.
Pas sulmeve, kryeministrja e Zelandës së Re, Jacinda Ardern, ka marrë vendim që ky vend t’i ndalojë të gjitha llojet e armëve gjysmë-automatike dhe pushkët me shënjestrim.
Tarrant e ka transmetuar drejtpërdrejt në Facebook aktin e tij. Facebook ka thënë se videoja e sulmuesit është shikuar më pak se 200 herë gjatë transmetimit të drejtpërdrejtë dhe rreth 4,000 herë përpara se është hequr nga rrjeti social.
