Po vazhdon të zbatohet me sukses projekti nacional i Stroke Center në kuadër të Qendrës Klinike Universitare të Kosovës, thuhet në një njoftim të Shërbimit Spitalor Klinik Universitar i Kosovës (SHSKUK)
Mbrëmë, një të riu 21 vjeçar, në fazën e hershme të humbjes së aftësisë së të folurit, të lëvizshmërisë së dorës dhe këmbës së djathtë, i është kryer trombektomia mekanike ( heqja e gjakut të ngjizur në arterien e trurit në mënyrë mekanike), rasti i dytë në Kosovë.
Ky intervenim është kryer në Klinikën e Radiologjisë, në bashkëpunim me Klinikën Emergjente, Klinikën e Neurologjisë dhe atë të Anestezionit, ku pas procedurës së kryer tek pacienti rezultoi me kthimin e menjëhershëm të lëvizshmërisë së humbur të gjymtyrëve.
Ekipi mjekësor përbëhej nga radiologët, Dr. Bujar Imeri, Dr. Ilir Bejta, Dr. Jeton Shatri udhëhequr nga Dr. Bujar Gjikolli, përkrahur nga ekipi i anestezionit Dr Arjan Ademi, anestezisti Tafil Gashi , Dr. Nerxhivane Halimi, Dr. Gazmend Hasbahta dhe Dr.Shkëndije Nuza.
Me këtë procedurë po stabilizohen shërbimet e neuroradiologjisë intervente në Klinikën e Radiologjisë duke ofruar mundësi pacientëve kosovarë të cilët këto shërbime nuk i kanë pasur më parë.
Për realizimin e këtyre procedurave, sistemi i shërbimeve shëndetësore në Kosovë duhet të jetë efektiv dhe reagimi duhet të bëhet para kalimit të dritares kohore prej 4-5 orëve nga fillimi i sulmit iskemik në tru, thuhet në fund të njoftimit.
