Kriza ekonomike gjithandej nuk i bëri fare përshtypje komunës së Gjilanit, respektivisht DKA-së, kur bëri publike konkursin në shkollat e qytetit, dhe si kriter futi Çertifikatën Shëndetësore, e cila në Institucionet publike për t’a marrë një të tillë ka koston 16€ duke përfshirë pagesën në bankë.
Kësaj duke i shtuar edhe koston e kopjeve dhe aplikimi në disa shkolla si e drejtë e secilit që plotëson kushtet për aplikim, na del se: çdo i papunë që mendon të aplikojë, duhet së pari t’i sigurojë 20€, dhe më pas të jetë një aplikues i cili pretendon të jetë i punësuar me kohë të caktuar në pozitën e lirë.
Vështirësitë që po i krijojnë Institucionet komunale të Gjilanit për një aplikues në pozita të ndryshme, e së fundmi edhe për konkursin në Arsim, janë të papranueshme, dhe diskriminuese, sepse jo të gjithë kanë mundësinë të marrin pjesë në një konkurs ku ka kosto të lartë, sidomos tani kur kriza ekonomike ka prekur shumicën e qytetarëve në Komunën e Gjilanit.
Kërkohet nga Komuna e Gjilanit, dhe Drejtoria e Arsimit që ky konkurs të anulohet, dhe pas rishpalljes të hiqet si kriter Çertifikata Shëndetësore për pjesëmarrjen në konkurs.
Partia e Drejtësisë – dega në Gjilan, Komisioni për Arsim
