Drejtoria e Bujqësisë dhe Pylltarisë së komunës së Vitisë, ka organizuar sot ceremoninë e nënshkrimit të kontratave për dhënien e donacioneve për 9 fermerët përfitues të projektit “ Përmirësimi i punësimit dhe mundësive për gjenerim të të ardhurave në zonat rurale të Kosovës, që implementohet nga Iniciativa për Zhvillim e Bujqësisë së Kosovës IADK.
Objekt i kësaj kontrate është dhënia e serrës, inputeve përcjellëse, fidanëve të perimeve për sezonën vjeshtore dhe pranverore dhe motokultivatorit frezë.
Kryetari i komunës Sokol Haliti, ka uruar fermerët përfitues të këtij projekti dhe ka theksuar se ky donacion është në vazhdën e bashkëpunimit që komuna e Vitisë ka me donatorë të ndryshëm, për të mbështetur fermerët dhe në përgjithësi sferën e bujqësisë në komunën e Vitisë.
Edhe Arlinda Sahiti, ka theksuar se Drejtoria e Bujqësisë vazhdon të jetë e përkushtuar për të mbështetur bujqit përmes projekteve të ndryshme si në perimtari, pemëtari, blegtori e sfera të tjera.
Përndryshe, ky është donacion i Brut Fur die Welt-Gjermani, në bashkëfinancim edhe me komunën e Vitisë. /2LONLINE.com/
