Ministri i Financave Avdullah Hoti ka vizituar sot Universitetin e Shkencave të Aplikuara në Ferizaj (UShAF), ku është pritur nga Rektori i Universitetit të Shkencave të Aplikuara në Ferizaj Agron Bajraktari.
Gjatë kësaj vizite ministri Avdullah Hoti gjithashtu mbajti një ligjëratë para studentëve të këtij universiteti, ku tha se ndihet i nderuar për ftesën e Universitetit që sot të jetë në një diskutim me studentët për fushën të cilën ai e mbulon për financat publike, për zhvillimet ekonomike dhe për reformat që po bëhen.
“Ne kishim një takim shumë miqësor me rektorin dhe bashkëpunëtorët e tij, për të gjetur një formë të bashkëpunimit me këtë Universitet, që realisht është specifik në Kosovë për shkak të profileve të veçanta që ofron. I uroj shumë sukses për imazhin që ka filluar të ndërtojë ky Universitet i ri dhe bashkëpunimin ndërkombëtar shumë të frytshëm që e ka në këtë drejtim”, tha ministri Hoti.
Ministri Avdullah Hoti theksoi se sheh një perspektivë të jashtëzakonshme për këtë Universitet për të përgatitur kuadro për Kosovë, regjion e më gjerë. “Tani ne kemi hyrë në disa rrugë tjera të integrimeve evropiane dhe besoj se përmes Marrëveshjes së Stabilizim-Asociimit mund të shfrytëzohen programe të ndryshme për të ndihmuar Universitetin në ngritjen e cilësisë, në certifikimin ndërkombëtar, pra fitimin e diplomave që njihen në nivel evropian”.
Ministri u shpreh i sigurt se shkallën e punësimit, studentët që studiojnë në këtë Universitet e kanë më të lartë se në cilindo universitet tjetër në Kosovë publik dhe privat.
Në ligjëratën e mbajtur para studentëve të UShAF, ministri Hoti gjithashtu foli për programin qeverisës, ku arsimi është njëri nga katër shtyllat. Ai theksoi se për dy vite të qeverisjes, është arritur të realizohet një pjesë e konsiderueshme e programit qeverisës, ndërsa elaboroi këtë program dhe foli për fushat, të cilat janë fokus i këtij programi.
Ministri Hoti, gjatë ligjëratës së tij u ndal edhe te politikat fiskale, lehtësirat që po krijohen për bizneset, ndërsa foli për kreditë ndërkombëtare, të cilat do të mundësojnë realizimin e projekteve të mëdha, që do të ndihmojnë zhvillimin ekonomik të Kosovës.
Ndërsa, Rektori i Universitetit të Shkencave të Aplikuara në Ferizaj Agron Bajraktari, u shpreh mirënjohës për vizitën e ministrit Hoti dhe e informoi atë për veprimtarinë e UShAF, zhvillimet në këtë institucion të ri të arsimit të lartë publik, kushtet dhe programet e studimit që ofron, si dhe interesimin në rritje për të studiuar në këto programe.
Po ashtu, Rektori e informoi ministrin e Financave edhe për bashkëpunimin me kompanitë vendore, por edhe për bashkëpunimin ndërkombëtar që ka krijuar UShAF për një vit e gjysmë të punës si Universitet.
“Ne ramë dakord edhe për nënshkrimin e një marrëveshje bashkëpunimi, ku studentët tanë në grupe të caktuara do të kenë mundësi të bëjnë pjesën e punës praktike. Ministri u zotua që përkundër numrit të madh të studentëve që do të kenë mundësi të marrin pjesë në këtë praktikë, ata do të kenë një pagesë, e cila do të jetë e mirëseardhur dhe do të lehtësojë studimet e tyre”, tha rektori Bajraktari, ndërsa theksoi se shpreson që kjo marrëveshje të nënshkruhet javën që vjen.
