Basketbollistët e Kosovës kanë filluar përgatitjet për dy ndeshjet parakualifikuese për Kampionatin Botëror 2023. Ashtu siç ishte paraparë, përgatitjet filluan të hënën dhe do të vazhdojnë edhe në ditët e ardhshme, derisa ndeshja e parë e Kosovës është ndaj Islandës më 20 shkurt në Prishtinë, kurse më 23 shkurt, “Dardanët” janë mysafirë të Luksemburgut.
Stërvitja e së hënës ishte e para për përzgjedhësin e ri të Kosovës, Christos Marmarinos.
“Kemi filluar mirë stërvitjet dhe do të mundohemi të përgatitemi sa më mirë, pasi nuk kemi shumë kohë. Synimet janë të fitojmë. Atmosfera në ekip është shumë e mirë. 17 Shkurti është ditë e rëndësishme për Kosovën. Është e rëndësishme që lojtarët që bartin fanellën e Kosovës të përfaqësojnë sa më mirë shtetin në garat ndërkombëtare”, deklaroi përzgjedhësi i Kosovës pas stërvitjes së parë.
Optimist në stërvitjen e parë ishte edhe Drilon Hajrizi.
“Hymë në këtë stërvitje pas angazhimeve me skuadrat gjatë Final 8. Besoj se do të angazhohemi maksimalisht. Kemi një ekip të mirë për të pasur sukses. Me punën që do të bëjmë shpresoj shumë se do të tregojmë lojëra të mira”, u shpreh Hajrizi.
Basketbollisti Erjon Kastrati foli gjithashtu pas stërvitjes së parë.
“Fillimisht dua të them se kam nderin dhe kënaqësinë që jam i ftuar në Kombëtaren e Kosovës. Stërvitja e parë ishte për tu njohur më shumë se si do të luajmë dhe në stërvitjet e ardhshme besoj se do të rritet intensisteti. Siç ka thënë trajneri duhet të mundohemi të fitojmë në çdo ndeshje. Do të japim më të mirën nga vetja jonë në këto ndeshje”, theksoi Kastrati.
