Nën Organizimin e Asamblesë Parlamentare të NATO-s dhe me ftesën e tyre, një delegacion i Kuvendit të Republikës së Kosovës, i kryesuar nga nënkryetari i Kuvendit, Xhavit Haliti, po qëndron në vizitë në selinë qendrore të NATO-s në Bruksel.
Delegacioni është i përbërë nga: Xhavit Haliti, Slobodan Petroviq, Time Kadriaj, Rexhep Selimi, Doruntinë Maloku- Kastrati , Ganimete Musliu, Zoran Mojsiloviq, Haxhi Shala dhe Danush Ademi.
Gjatë ditës se djeshme, delegacioni ka takuar personalitete të larta në AP të NATO-s: zonjën Rose E. Gottemoeller, zëvendëssekretare e Përgjithshme e NATO-s, Jamie Shea, zëvendësndihmës i Sekretarit të Përgjithshëm, Michel Soula, kryesues i sektorit A në Divizionin e Operacioneve, Robert Pszczel, zyrtar i lartë për Rusi, Ballkanin Perëndimor në Divizionin e Diplomacisë Publike, znj. Carmen Romero, zëvendesndihmëse e Sekretarit të Përgjithshëm për Diplomaci Publike, asistente e Sekretarit të Përgjithshëm në Divizionin e Diplomacisë Publike, Petrika Jorgji, i ngarkuar me punë i përfaqësuesit të përhershëm të Shqipërisë në NATO, Gabor Marosfi, zëvendës i përfaqësuesit të përhershëm të Hungarisë në NATO, Milos Nikoliq, ushtrues i detyrës i zëvendësit të përfaqësuesit të përhershëm të Malit të Zi në NATO.
Ndërkaq gjatë ditës se sotme delegacioni do të takojë z. David Hobbs, Sekretar i Përgjithshëm i Asamblesë Parlamentare të NATO-s, znj. Ruxandra Popa, zëvendëssekretare e Përgjithshme e Asamblesë Parlamentare të NATO-s, znj. Tanya Hartman, zyrtare politike në Divizionin për partnership Euro-Atlantik dhe Global, gjeneralin e brigadës, z. Badialetti, zëvendësdrejtor, Divizioni i Operacioneve dhe Planifikimit , Christian Meuëly, Ambasador dhe kryesues i delegacionit zviceran ne NATO, Anthe Fritz, zëvendëskryesues i Operacioneve për Evopën Juglindore, Vlatko Cvrtila, ish-kryesues i Këshillit të Mbikëqyrjes Civile të Kroacisë, Ljubica Jelusic, deputete në Kuvendin Kombëtar të Sllovenisë, ligjëruese në studimet për mbrojtje në Universitetin e Lubjanës, ish-ministre e Mbrojtjes.
Ndër temat kryesore që po diskutohen janë: bashkëpunimi i Kosovës me KFOR-in dhe NATO-n, Gjykata Speciale, demarkacioni i Kufirit me Malin e Zi, rëndësia e vazhdimit të dialogut mes Kosovës dhe Serbisë, ngritja e kapaciteteve FSK-së dhe mbështetja e mëtejme e saj.
http://www.kuvendikosoves.org/?cid=1,128,9281
