![Ministri Ejup Maqedonci priti në takim lamtumirës këshilltarin, Joe Duncan](https://2lonline.com/file/2024/07/MAQEDONCI_DUNCAN24722-850x560.webp)
Ministri i Mbrojtjes, Ejup Maqedonci, priti në takim lamtumirës këshilltarin për Planifikim, Programim, Buxhetim dhe Ekzekutim (PPBE), në kuadër të Programit Global të Reformës së Mbrojtjes të ShBA-ve, Joe Duncan.
Me rastin e përfundimit të misionit, ministri Maqedonci e falënderoi këshilltarin amerikan për kontributin e jashtëzakonshëm në zhvillimin e kapaciteteve të mbrojtjes të vendit dhe e dekoroi me medaljen për shërbim të shquar.
Përgjatë misionit të tij, në cilësinë e këshilltarit në Ministrinë e Mbrojtjes dhe Forcën e Sigurisë së Kosovës, z. Duncan është spikatur veçanërisht për angazhimin e tij në hartimin e rregullores për planifikim, programim, buxhetim dhe ekzekutim, dokument që rregullon procesin e brendshëm të MM/FSK për përdorimin dhe shpërndarjen në mënyrë efektive dhe efikase të burimeve për të ofruar aftësi dhe për të zbatuar veprimet e nevojshme për të përmbushur misionin kushtetues dhe ligjor të Ministrisë.
Me këtë rast, ministri Maqedonci shprehu falënderimin dhe mirënjohjen stafit ushtarak pranë Ambasadës së SHBA-ve në Prishtinë, për mbështetjen e vazhdueshme me këshilltarë dhe trajnime për stafin civil e ushtarak, me qëllim ngritjen profesionale të personelit të Ministrisë së Mbrojtjes dhe Forcës së Sigurisë së Kosovës. /2LONLINE/