Cikli i dëgjimeve buxhetore, të cilin e ka nisur këtë javë Komuna e Gjilanit, pas Përlepnicës, Dobërçanit, Malishevës e Zhegrës, ka vazhduar sot në dy lagje të qytetit, Dheu i Bardhë dhe Dardania, ku po ashtu janë dëgjuar dhe evidentuar kërkesat e qytetarëve, të cilat do të përfshihen në listën e prioriteteve për investime gjatë vitit 2022.
Shpresa Kurteshi Emini, kryesuese e Kuvendit Komunal, ka thënë se banorët e lagjes Dardania, kanë identifikuar si prioritete të tyre rregullimin e infrastrukturës rrugore dhe një qendër rinore te pjesa e parkut, kurse ata të lagjes Dheu i Bardhë kanë thënë se kanë nevojë për infrastrukturë, një çerdhe në Porodin, një nënkalim që e lidhë këtë pjesë me lagjen si dhe mbulimin e shtratit të lumit Stanishorka.
“Ne jemi duke bërë përpjekje maksimale si Komunë që investimet t`i shpërndajmë në mënyrë të balancuar, si në fshat, ashtu edhe nëpër lagje të qytetit, duke iu dhënë përparësi projekteve të cilat ndikojnë drejtpërdrejt në mirëqenien e qytetarëve dhe që identifikohen si prioritete prej vetë atyre”, ka thënë Kurteshi-Emini.
Përndryshe, cikli i dëgjimeve buxhetore vazhdon në lokalitetet tjera, sikurse takime të veçanta do të mbahen edhe me gra, rini dhe komunitete.
Komuna e Gjilanit i shpërndanë investimet në konsultim me qytetarin, i cili i njeh dhe i ndjen më së miri nevojat e lokalitetit ku jeton, ka thënë Shpresa Kurteshi-Emini.
Dëgjimet buxhetore organizohen nga Komiteti për Politikë dhe Financa. /2LONLINE.com/
