Kryetari i Komunës së Kamenicës, Kadri Rahimaj, ka mbajtur takim me drejtoreshën ekzekutive të OJQ NOPM, Besa Tusha Maliqi.
Në këtë takim është nënshkruar memorandumi i mirëkuptimit “Forcimi i integritetit të të rinjve dhe nëpunësve civilë për të luftuar korrupsionin në nivel lokal”.
I pari i komunës ka thënë se angazhimi kundër korrupsionit do të jetë sistematik, i pakompromis.
““Forcimi i integritetit të të rinjve dhe nëpunësve civilë për të luftuar korrupsionin në nivel lokal” quhet memorandumi i mirëkuptimit që e nënshkruam sot, me OJQ-në, NOPM.
Angazhimi ynë kundër korrupsionit do të jetë sistematik, i pa kompromis dhe me metodat më efikase të dëshmuara. Këtë e bëjmë më së miri duke bashkëpunuar me shoqërinë civile dhe qytetarët”, ka thënë ai.
Ndërsa drejtoresha ekzekutive e OJQ NOPM, Besa Tusha Maliqi, tha se objektivi i projektit është të forcojë integritetin e të rinjve dhe nëpunësve civilë që përmes pjesëmarrjes aktive bëjnë raportimin e korrupsionit, ndihmojë në përmirësimin e integritetit të zyrtarëve komunalë, qytetarëve dhe të rinjve në drejtim të rritjes së vullnetit të tyre për të luftuar dhe raportojnë akte korruptive.
“Nëpërmjet projektit do të përmirësohen njohuritë e nëpunësve civilë për luftën kundër korrupsionit dhe integritetit, si dhe përmirësimin e aftësive për zbatimin e legjislacionit ne fuqi. Ndërsa nëpërmjet trajnimeve do të ndihmojë nëpunësit civilë të punojnë hapur dhe transparentë, duke u udhëhequr nga rregullat e etikës për nëpunësit civilë kurse për te zgjedhurit e popullit dhe te nominuarit politik do te nënshkruhet Kodi i Etikes”, ka thënë ajo.
Ndryshe ky grant mbështetet nga “Programi i Shoqërisë Civile për Shqipërinë dhe Kosovën”, financuar nga Ministria e Punëve të Jashtme Norvegjeze dhe menaxhuar nga Fondacioni Kosovar për Shoqëri Civile (KCSF) në partneritet me Partnerët Shqipëri për Ndryshim dhe Zhvillim (PA). Përmbajtja dhe rekomandimet nuk përfaqësojnë qëndrimin zyrtar të Ministrisë së Punëve të Jashtme të Norvegjisë dhe Fondacionit Kosovar për Shoqëri Civile (KCSF). /2LONLINE/
