Organizuar nga Komuna e Vitisë, konkretisht nga Drejtoria për Ekonomi, Financa dhe Zhvillim dhe Zyra për Informim dhe Marrëdhënie me Publikun në këtë komunë, ka filluar cikli i diskutimeve publike për planifikimin e buxhetit komunal për vitet 2023-2025.
Diskutimi i parë është mbajtur në qytetin e Vitisë, konkretisht në Sallën e Kuvendit Komunal, me personelin arsimor dhe shëndetësor.
Me këtë rast zëvendëskryetari i Komunës së Vitisë, Hasan Aliu ndër tjerash tha se Komuna e Vitisë, edhe sivjet po e ndjek praktikën e mirë të hartimit të përbashkët të buxhetit komunal, në veçanti të listës për investime kapitale dhe atë me grupet e ndryshme të interesit dhe me banorë të ndryshëm të lokaliteteve.
Ai potencoi se janë paraparë të mbahet edhe 8 diskutime publike nga Komuna e Vitisë në lokalitete, por edhe me kategoritë e ndryshme të shoqërisë.
Ndërkaq Besnik Imeri, Drejtor për Ekonomi, Financa dhe Zhvillim prezantoj draft buxheti për vitin 2023 duke theksuar se pjesa më e madhe e buxhetit shkon në kategorinë paga dhe mëditje.
Drejtori Imeri bëri me dije se buxheti i planifikuar për vitin 2023 për komunën e Vitisë do të jetë mbi 14 milion e 996 mijë euro, nga to për paga dhe mëditje do të shkojnë rreth 7 milion e 627 mijë euro, për mallra dhe shërbime 2 milion e 432 mijë euro, shërbimet komunale 325 mijë euro, subvencione 570 mijë euro dhe investime kapitale prej 4 milion e 040 mijë euro, apo 27 % e buxhetit komunal.
Në këtë takim morën pjesë edhe Bekim Azizi, kryesues i Kuvendit Komunal të Vitisë, si dhe Fatbardha Emini, drejtoresh për Arsim dhe Merrushe Ahmeti, drejtoresh për Shëndetësi dhe Mirëqenie Sociale, të cilat edhe prezantuan investimet e parapara në 3 vitet e ardhshme në sektorët e tyre.
Ndërkaq gjatë këtij takimi pjesëmarrësit patën disa propozime e kërkesa. Në shkollën e Radivojcit u kërkua të ndërtohet një sallë sportive dhe të këtë shtim të kabineteve e bibliotekave. Në Sh.M.P “Jonuz Zejnullahu” në Viti, të shtohet buxheti për furnizim me material konsumues për kabinetet dhe të këtë buxhet më të madh për aftësim profesional.
Gjithashtu në SH.M.F.U “Baft Haxhiu” në Viti, u paraqit kërkesa nga drejtori i kësaj shkolle për shtim të buxhetit për shkak të nevojave të mëdha me që posedon një numër të madh të nxënësve, me që rast u tha se ka mungesë të klasave dhe kabineteve shkollore, pastaj rregullimi dhe ndërtimi i rrethojës së oborrit të shkollës që do të ndikonte edhe në sigurinë e nxënësve.
Edhe përfaqësuesit e shkollave të tjera paraqitën kërkesa nga më të ndryshmet që konsiderohen si prioritare, por ajo që njëzëri u kërkua ishte rritja e buxhetit për shkolla.
Ndërkaq në fushën e shëndetësisë, u kërkua që të investohet në ndërtimin e një aneksi shtesë që do të shërbente për trajtim ditor të personave me probleme psikike.
Gjithashtu, si nevojë u paraqit ndërtimi i një çerdhe të fëmijëve, për shkak se kërkesat për mbikëqyrjen ditore të fëmijëve janë të mëdha. /2LONLINE/
