(2LONLINE) – Njësite Kundër krimeve ekonomike të Policisë së Kosovës nga shtabi qendror që veprojnë në Rajonin e Gjilanit, në bashkëpunim me Njësitin e Doganës së Kosovës, kanë realizuar kontroll në dy komuna, katër lokacione të ndara të bastoreve sportive dy në fshatin Radivojcë komuna Viti, dhe dy lokacione bastore sportive në Kamenicë me dyshimin se të njëjtat zhvillojnë veprimtari ilegale.
Ismet Hashani, zëdhënës i Policisë së Kosovës (PK), në Drejtorinë Rajonale në Gjilan ka bërë me dije se në lokacionin e parë ne fshatin Radivojc -Viti është kontrolluar bastorja “Super Bast”, ku gjatë kontrollit janë hasur pajisje kompjuterike me të cilin dyshohet se është zhvilluar veprimtari e kundërligjshme e lojërave “Keno”, ku janë konfiskuar këto pajisje.
Në lokacionin e dytë po në fshatin Radivojc -Viti pas kontrollimit janë gjetur dhe sekuestruar tre aparate të kompanisë “Merkur” që ishin të instaluar pa leje përkatëse.
Po ashtu hashani tha se në lokacionin e parë në Kamenicë është kontrolluar bastorja “Super sport”, ku gjatë kontrollit është hasur të instaluara pajisje kompjuterike me të cilin dyshohet se është zhvilluar veprimtari e kundërligjshme e lojërave “Keno”, për çka edhe janë konfiskuar të gjitha këto pajisje.
Në lokacionin e dytë Komuna Kamenicë në fshatin Bosce është kontrolluar një lokal i lojërave të fatit, ku gjatë kontrollit është vërejtur se i njëjti ka të instaluar një bastore e cila nuk është e licencuar ,ku dyshohet se është zhvilluar veprimtari e kundërligjshme e lojërave “Keno”, për çka edhe janë konfiskuar aparatet e këtyre lojërave.
Në lidhje me të gjitha veprimet e ndërmarra është njoftuar Prokuroria Themelore-Gjilan.
Hetimet e këtij rasti do të vazhdojnë në koordinim me institucionet e lartshënuara. /2lonline/
