Në kuadër të javës së 24-të, të Superligës së Kosovës në futboll, në Gjilan, takohen Drita e Prishtina dhe për detaje të kësaj ndeshje, por edhe për pritshmëritë u fol sot në konferencën ku u paraqitën kryetrajneri i klubit gjilanas, Zekirija Ramadani dhe sulmuesi Blerim Krasniqi.
Kryetrajneri Zekirija Ramadani tha se ndeshjet me ekipet me histori janë gjithmonë derbi dhe për këtë duhet dhënë maksimumin nesër.
“E dim që nesër na pret një ndeshje e vështirë, gjithmonë kundër FC Prishtinës është një ndeshje derbi, ndeshje e rëndë por ne jemi përgatitur edhe në aspektin psikologjik dhe gjithçka tjetër. Nuk ka ndeshje të lehtë, por kur bëhet fjalë për skuadra të mëdha motivi te futbollistët është më i lartë. Nesër duhet të jemi të kujdesshëm dhe të vëmendshëm, nuk duhet të shpenzojmë enërgji kur nuk është e nevojshme. Kemi besim te ekipi, kemi kualitet brenda grupit dhe objektivi jonë nuk na lenë të bëjmë dy hapa pas njëra pas tjetrës”, theksoi trajneri Zekirija Ramadani.
Ai tha se nuk u takon, nëse kanë objektiv kreun e tabelës dhe Kupën, të bëjnë dy hapa prapa.
“Na ndodhi para një jave me Fc Fushë Kosova dhe neve nuk na takon ta përsërisim. Ne duhet të luajmë me mençuri, të mos shpenzuar shumë energji të pa nevojshme, por duke shpenzuar shumë energji për të arritur te objektivin”, përfundoi Ramadani.
Ndërkaq, futbollisti Blerim Krasniqi thekson se synim është fitorja, s’ka rëndësi kush shënon apo kush nuk shënon.
“Është ndeshja jonë e radhës ku duhet me dhënë maksimumin të gjithë lojtarët që të marrim pikë maksimale. Normalisht se është e vështirë, sepse FC Prishtina është ndër ekipet më të mira në ligë. Do japim gjithçka për të arritur tre pikët, pastaj do t’i marrim ndeshjet një nga një duke dhënë maksimumin. Besoj nuk do të jetë e lehtë, sepse kemi shpenzua energji por do ta menaxhojmë situatën dhe do të bëjmë atë që duhet të bëjmë si gjithmonë”, ka thënë Krasniqi.
Ndeshja FC DRITA – FC Prishtina zhvillohet nesër e shtune, në stadiumin sintetik (te rrethi), ora 13:00. /2LONLINE/
