Policia e Kosovës me qëllim të informimit të drejt të opinionit dhe qytetarëve, lidhur me rastin “Zjarrvënie” të pronës së mbjellë me grurë, në fshatin Binqë të Vitisë, të raportuar me datë 02.07.2021 në stacionin policor në Viti nga ankuesi mashkull shtetas kosovar i nacionalitet serb, përmes këtij njoftimi zyrtar informon se:
Polica e Kosovës pas marrjes së deklaratës dhe inicimit të rastit nga prokurori kompetent si ” Zjarrvënie”, ka ndërmarrë të gjitha veprimet e nevojshme hetimore, duke angazhuar të gjitha njësitet relevante policore me qëllim të zbardhjes dhe ndriçimit sa më parë të këtij rasti.
Ismet Hashani, zëdhënës i Policisë së Kosovës (PK), në Drejtorinë Rajonale në Gjilan ka bërë me dije se në vendin e ngjarjes përveç njësiteve nga stacioni policor i Vitisë kanë dalë hetuesit rajonal dhe njësia rajonale e forenezikes, së bashku me inspektorin komunal të zjarrit, të cilët gjatë ekzaminimit të vendit të ngjarjes kanë vërejtur dhe nxjerrë dyshimet se burimi i shpërthimit të zjarrit, dyshohet se ka ndodhur nga një grumbull ilegal i mbeturinave e cila gjendej në largësi prej 86 metrave nga parcela e mbjellë me grurë.
“Pra vendi ku dyshohet se është burimi i zjarrit nga mbeturinat është djerrinë dhe për momentin nuk dihet se pronë e kujt është dhe në përhapjen e zjarrit mund të kenë ndikuar temperaturat e larta dhe era e cila ka fryrë, ku si pasojë zjarri ka kapluar edhe pronën e ankuesit”, ka thënë hashani, transmeton Portali 2LONLINE.com.
Bazuar në hetimet e deritanishme nuk ka ndonjë dëshmi apo informacion se zjarri është shkaktuar me qëllim për të dëmtuar pronën e ankuesit, por siç u theksua zjarri dyshohet të jetë shkaktuar nga djegia e mbeturinave.
“Po ashtu vlen të theksohet se përveç kësaj parcele është dëmtuar edhe një parcelë tjetër e cila ishte djerrin si dhe një pjesë e malit që gjendet në afërsi. Lidhur me rastin janë duke vazhduar hetimet dhe veprimet policore në bashkëpunim dhe koordinim edhe me Prokurorin e Shtetit”, ka thënë zëdhënësi Hashani. /2LONLINE.com/
