Basketbollisti i përfaqësueses së Serbisë, Nikola Kalinic, u pyet nga e përditshmja e Beogradit, Blic, se çfarë ishte pikëpamja e tij rreth çështjes së Kosovës.
Kalinic është përgjigjur se është momenti i fundit që të zgjidhet problemi i Kosovës dhe të vazhdohet nga e ardhmja.
“Ta zgjidhim më fund këtë problem, lufta e Kosovës ka ndodhur para 600 vjetësh, ndërsa për shumë dekada ajo nuk është territor yni, le të më korrigjojë historia dhe ata që dinë më shumë nëse po gaboj”.
“Askush nuk jeton nga e kaluara dhe sa më shpejt të pajtohemi me të tashmen dhe të vazhdojmë tutje do të jetë më mirë për ne. Nuk jemi popull qiellor, e as që kemi qenë ndonjëherë, kemi pasur momente të ndritshme në të kaluarën, por duhet të pajtohemi me faktin se tash jemi një pikë e vogël dhe e parëndësishme në hartën e madhe të botës”, ka thënë Kalinic.
Ai u ka bërë thirrje atyre që nuk i besojnë që të udhëtojnë pak nëpër botë dhe t’iu thonë të huajve prej nga janë dhe kush janë.
“Jam i sigurt, do të përjetoni dëshpërim të pamasë. Unë e kam përjetuar”, ka thënë basketbollisti Nikola Kalinic.
Ai është shprehur se është i ndërgjegjshëm se tani shumë serbë do ta urrejnë, porse është koha që dikush ta thotë botërisht këtë.
Nikola aktualisht luan për Fenerbahshçen e Turqisë.
