Përfaqësuesja gjermane e futbollit të femrave ka mundur “pa u lodhur” me rezultatin shumë të thellë 13:0 (7:0) përfaqësuesen sllovene. Me këtë fitore, kampionet evropiane janë në vendin e parë në grupin e parë kualifikues për Kampionatin Botëror. Në dy ndeshet e deritashme gjermanet kanë grumbulluar 6 pika, kanë shënuar 22 gola dhe nuk kanë marrë asnjë!
Vetëm rreth 500 shikues e kanë parë ndeshjen në Kopër të Sllovenisë, në të cilën u shënuan plot 13 gola. Dy nga lojtaret gjermane, Sasic dhe Mittag kanë shënuar nga tre gola. Ndërsa lojtarja më e mirë e Gjermanisë, Fatmire Bajramaj, e cila deri pak ditë më parë ndodhej në shërim pas lëndimit të pësuar vitin e kaluar, ka shënuar kësaj here vetëm një gol, në minutën 62, shkruan albinfo.ch.
Të kujtojmë se edhe javën e kaluar gjermanet kanë shënuar një fitore të ngjashme, gjegjësisht 9:0 kundër Rusisë. Një meritë të madhe në fitore pati edhe Fatmire Bajramaj, e cila me kthimin e saj në njëmbëdhjetëshin e parë pas 13 muajsh pauzë, ofroi një performancë mjaft bindëse. Përveç golit që shënoi vetë, Bajramaj ka përgatitur edhe shtatë nga golat e shënuar gjatë ndeshjes.
Fatmire Bajramaj, siç shkruajnë mediet gjermane është në prag të martesës me futbollistin shqiptar të bundesligës së dtë, Enis Alushin.
