Autoritetet e Serbisë nuk ia kanë lejuar vizitën ministrit të Punëve të Brendshme të Kosovës, Xhelal Sveçla, në Luginë të Preshevës, që ishte paraparë me ftesë të Nevzad Lutfiu, Kryetar i Këshillit Kombëtar Shqiptar.
Kryetari Lutfiu kishte ftuar ministrin Sveçlën për vizitë në Preshevë, Medvegjë dhe Bujanoc, por autoritetet serbe nuk e kanë lejuar një gjë të tillë, e sipas ministrit Sveçla, për këtë nuk është dhënë madje asnjë shpjegim.
Ministri Sveçla, përmes një postimi në profilin e tij ka bërë me dije se për çështjen e vizitave të zyrtarëve shtetërorë, do të veprojnë mbi parimet e reciprocitetit si vlerë e barazisë mes dy shteteve.
Ja postimi i tij:
Me datë 29 dhjetor kam pranuar ftesë nga z. Nevzad Lutfiu, Kryetar i Këshillit Kombëtar Shqiptar për vizitë në Preshevë, Medvegjë dhe Bujanoc. Sipas agjendës, ishin planifikuar takime në selitë e Këshillit në tri komuna si dhe me deputetin e vetëm shqiptar në Parlamentin e Serbisë Shaip Kamberi. Me kënaqësi kam pranuar ftesën dhe kam filluar përgatitjet.
Në respektim të marrëveshjes së Brukselit dhe praktikave të deritanishme, përmes Ministrisë së Punëve të Jashtme dhe Diasporës kemi përcjellur agjendën dhe informatat e nevojshme të delegacionit në zyren ndërlidhëse të Serbisë për leje të hyrjes në Serbi dhe realizim të vizitës.
Mbrëmë në orët e vona, nga zyrtari ynë ndërlidhës në Beograd jam njoftuar se kërkesa jonë për vizitën e sotme në Luginë është refuzuar nga autoritetet e Serbisë pa asnjë spjegim.
Ky akt i Serbisë ndaj vizitës sime dëshmon qasjen destruktive dhe shtypjen e vazhdueshme të saj ndaj shqiptarëve të Luginës.
Ky refuzim pa asnjë arsyetim nga Serbia disa orë para realizimit të vizitës, nuk zbehë qëllimet dhe angazhimin tonë për shqiptarët e Luginës. Ndër të tjera, nuk do të zbehë as dëshirën dhe qëllimin tim për realizim të vizitës atje, për të ndarë me shqiptarët e Luginës shqetësimet e padrejtësitë me të cilat ata ballafaqohen dhe angazhimet e institucioneve të Republikës sonë për ta.
Për çështjen e vizitave të zyrtarëve shtetërorë, ne do të veprojmë mbi parimet e reciprocitetit si vlerë e barazisë mes dy shteteve tona. /2LONLINE/
