/2L ONLINE/ – Autoritetet policore kanë raportuar për dy raste të ndryshme që kanë ndodhur në fshatin Velekincë të Gjilanit, një rast të një tentim vjedhjeje dhe një rast i posedimit të narkotikëve. Duke raportuar për rastin e parë, mësohet se është arrestuar i dyshuari pasi që i njëjti së bashku me dy të dyshuar të tjerë ka tentuar të kryejë një vjedhje në shtëpinë e viktimës në fshatin Velekincë të Gjilanit.
Njësiti patrullues ka arritur ta identifikojë të dyshuarin dhe ka konstatuar se i njëjti është nga regjioni i Mitrovicës e së bashku me dy të dyshuar të tjerë ka shkuar në lokacionin e cekur me qëllim të vjedhjes.
I dyshuari gjatë intervistimit ka pranuar se ka kryer vjedhje nëpër shtëpi të ndryshme. Dy të dyshuarit e tjerë gjenden në arrati. Me urdhër të prokurorit i dyshuari dërgohet në mbajtje.
Ndërsa, në rastin tjetër, mësohet se ankuesi ka raportuar se ka vërejtur se një i dyshuar i panjohur nga një veturë ka hedhur në tokë një qese. Njësiti policor në vendin e ngjarjes ka konstatuar se ka të bëjë me substancë të dyshuar narkotike të llojit marihuanë në peshë prej 15 gramë. /2L ONLINE/
