(2LONLINE) – Në një letër të hapur drejtuar avokati të popullit Sami Kurteshi, Lëvizja Vatra në Gjilan ka shprehur shqetësimin e saj për problemet që po i kanë banorët e Kosovës Lindore (Preshevë, Medvegjë e Bujanoc), në lidhje me mos pajisjen me dokumentacione ndonëse u bënë 15 vite, që kur vendosja e forcave policoro-ushtarake në Kosovën Lindore (Preshevë, Medvegjë e Bujanoc), në korrik të vitit 1999, provokoi banorët shqiptarë që të largohen masovikisht nga vatrat e tyre dhe vendosja e tyre u bë në Kosovë, përkatësisht në Gjilan, Fushë Kosovë, Prishtinë e qytete tjera të saj.
Sejdulla Kadriu, kryetari i Lëvizjes “Vatra” tha se faktori shqiptar ishte i pa ndikim të bënte diçka për kthimin e atyre banorëve në trojet prej nga kishin ardhur, sidomos nga Malësia e Bujanocit, Medvegja dhe Karadaku i Preshevës. Këta qytetarë shqiptarë fillimisht u vendosën si refugjatë, duke shpresuar se së shpejti ushtria dhe polica serbe do të tërhiqet nga vendbanimet e tyre, e ata do të kthehen në vatrat nga ishin dëbuar.
“U bën 15 vite, e këta banorë shqiptarë në Kosovë, nuk mbajtën as epitetin e refugjatit, as banorë në shtetin e tyre, madje ata e kanë ndjerë veten edhe si të lënë pas dore nga të gjithë: edhe nga “Elita” politike e Kosovës Lindore e edhe nga institucionet komunale e Republikane të Kosovës”, thotë Kadriu.
Sipas itj, qëllimi i kësaj letre nuk është që të kërkojnë përgjegjësi nga të apostrofuarit më lartë, por se avokat i popullit të e thuani troç të drejtën e këtyre banorëve për marrjen e dokumenteve të identifikimit, ngase një pjesë e kësaj popullata kanë mbetur pa dokumente, një e drejtë elementare e njeriut. Gjithashtu për të ditur se, çka janë, ku jetojnë e çka do të behet me ta në të ardhmen, sepse pa dokumente cenohen shumë të drejta si: sociale, të shkollimit, ekonomike, kulturore etj, me një fjalë iu cenohen të drejtat të jenë te barabartë me qytetarët e tjerë.
Kadriu tha se problemet shtohen edhe më shumë për të rinjtë, të cilët në kohën kur u dëbuan nga vendlindja e tyre, ishin shumë të vegjël për t’u pajisur me dokumente identifikimi, por edhe në vendin ku kishin ardhur fillimisht si refugjatë.
“Ata, sot e asaj dite nuk mund të pajisen me dokumente identifikimi, sepse shteti serb u kërkon dokument që dëshmojnë se janë duke jetuar në Serbi ( Serbia e din që janë duke jetuar ne Kosovë, e në asnjë mënyrë nuk lëshon dokumente), po ashtu edhe Kosova u kërkon certifikatën e vendbanimit, dëshmi se kanë pronë në Kosovë, apo të kenë kontrata banimi nga koha që kur kanë ardhur, e që nuk mund t’i sigurojnë as në Kosovë e as në Serbi”, ka thënë Kadriu i Vatrës.
Sipas tij, madje tingëllon absurde, por kështu është, kur institucionet e Kosovës kërkojnë, që banorët të sjellin dëshmi nga gjykata serbe që nuk janë nën hetime. Kjo kërkesë automatikisht i lë pa dokumente ish-pjesëtarët e UÇPMB-së, të cilët në asnjë mënyrë nuk mund të marrin një dokument të tillë, por edhe të shkojnë të kërkojnë, ata do të burgosen nga organet serbe.
“Këta qytetarë qe 15 vite kanë mbetur peng, nuk din çka të bëjnë dhe kujt t’i drejtohen më. Posaçërisht në gjendje shumë të rendë gjenden të rinjtë që kanë mbushur 18 vite. Atyre janë duke ju cenuar të drejtat për shkollim, për lëvizje të lirë etj. Me një fjalë ju cenohet ardhmëria”, thotë Kadriu.
Sipas tij, këto probleme dhe pengesa të pa nevojshme administrative ndaj qytetarëve të dëbuar nga Kosova Lindore (Preshevë, Medvegjë e Bujanoc), kërkojnë zgjidhje të menjëhershme, në mënyrë që t’u mundësohet qytetarëve të dëbuar nga kjo trevë të njihen si banorë të Kosovës.
“Kemi kërkuar dhe trokitur në shumë dyer, por problemi nuk është zgjidhur, andaj ju bëjmë thirrje edhe ju z. Avokat i Popullit, të përdorni ndikimin, edhe autoritetin tuaj, dhe të bëni diçka të mirë për këtë popullatë, për hir të rinisë dhe të ardhmes se tyre. Ne të gjithë e dimë se, kjo popullatë nuk është larguar me dëshirë, por para tytave të automatikut”, thotë Kadriu.
Ai shtoi se kërkesa e tyre është e sinqertë, njerëzore, humane, por edhe kombëtare, ndaj, janë të bindur se Avokati i Popullit Kurteshi, do të ndërmerr diçka në të mirë të qytetarëve që janë lënë pas dore nga të gjithë. /2lonline/
