Kosova triumfoi ndaj Çekisë me rezultat 2:1 në stadiumin “Fadil Vokrri”, duke e marrë përkohësisht kryesimin në grupin A.
Mirëpo, një orë më vonë Anglia zhvilloi ndeshjen ndaj Bullgarisë që e mposhti me rezultat të thellë 4:0 duke rrëmbyer kreun e tabelës me një pikë më shumë se Kosova.
Pas ndeshjes, trajneri i Anglisë, Gareth Southgate ka folur edhe për duelin ndaj Kosovës që zhvillohet të martën në Southampton.
“Ndeshja me Kosovën është kryesorja në grup, sipas meje. Jam shumë i impresionuar me Kosovën. Janë një ekip i organizuar mirë, me lojtarë të mirë. E kanë pasionin e një kombëtareje të krijuar së fundi. Rezultati i tyre sot nuk më ka befasuar aspak. I kam parë që luajnë mirë edhe në ndeshjet paraprake. Me ta duhet të luajmë më mirë se që luajtëm sot (me Bullgarinë). Do të jetë një test i mirë për ne, të martën”, ka thënë Southgate pas ndeshjes.
