Kryetari i Komunës së Vitisë, Sokol Haliti me bashkëpunëtorë ka pritur sot Përfaqësuesin Special të Sekretarit të Përgjithshëm të UNMIK-ut, z. Zahir Tanin.
Gjatë këtij takimi Kryetari Haliti e ka njoftuar atë dhe bashkëpunëtorit e tij lidhur me projektet e ndryshme në komunën e Vitisë që janë realizuar dhe ato që pritet të realizohen në vitin në vijim.
Kreu i Komunës së Vitisë ka potencuar se kjo komunë përveç që ka bashkëpunime të mira ndër komunale në nivel vendi ka bashkëpunime edhe në nivel ndërkombëtar.
“Komuna e Vitisë ka bashkëpunime të shumta jo vetëm në nivel vendi por edhe në atë ndërkombëtar. Ne kemi bashkëpunim të mirë me Komunën e Kirchhain të Gjermanisë në kuadër të Agjendës 2030 për zhvillim të qëndrueshëm. Gjithashtu kemi bashkëpunim të mirë edhe me Komunën e Likovës dhe Kriva Plankës së Maqedonisë së Veriut në kuadër të projektit ndërkufitar Cross Border të Bashkimit Evropian”, u shpreh Kryetari Haliti.
Ai potencoi se bashkëpunime të tilla ka edhe me Komunën Velika Pisanica dhe me Qytetin e Masonit- Michigan të Shteteve të Bashkuara të Amerikës. Ndërkaq Kryetari Haliti e njoftoj z. Tanin me potencialet e shumta që ka komuna e Vitisë për investime por edhe me nevojat.
Kurse përfaqësuesin special i Sekretarit të Përgjithshëm të UNMIK-ut, z. Zahir Tanin u shpreh se ata janë të njoftuar me punën e mirë që po bëhet në Komunën e Vitisë për të gjithë qytetarët.
Ai gjithashtu potencoi se UNMIK-u do të shikoj nevojat të cilat i ka komuna e Vitisë dhe mundësitë për përkrahje.
Duke folur mbi çështjen e sigurisë në këtë Komunë, Haliti potencoi se siguria në komunën e Vitisë, është e mirë dhe stabile por potencoi nevojën e vendosjes së kamerave në qytet.
Komandanti i Stacionit Policor në Viti, z. Afrim Halili shtoi se gjendja e sigurisë në këtë komunë me të vërtetë është e qetë dhe stabile dhe nuk ka probleme ndër etnike dhe ndër fetare dhe vuri në pah kushtet jo të mira që ka ky stacion policor në objektin e vjetruar.
Megjithatë ai shpreson se këto kushte do të përmirësohen sa më parë.
Ndërkaq lidhur me propozimin e Haliti që të vendosën kamera të vëzhgimit në qytet ai tha se ato ndikojnë pozitivisht në siguri.
