Politikanët enden nëpër gara zgjedhore e Kosova po zbrazet, të rinjtë po ikin!

Kriza shëndetësore dhe ekonomike që erdhi si pasojë e pandemisë së koronavirusit, rriti interesimin e qytetarëve për të dal jashtë shtetit për punë e jetë më të mirë.

Kjo situatë pandemike për dallim nga shtetet tjera rriti edhe përplasjet e politikanëve kosovarë dhe apetitet e tyre për pushtet e zgjedhje të reja. Qytetarët panë rrëzimin e dy qeverive në kohën kur shëndeti publik rrezikohej nga virusi.

Kosova sërish do të mbajë më 14 shkurt zgjedhjet e radhës parlamentare, e në fushatat e tyre edhe këtë herë partitë politike po flasin për zhvillimin ekonomik e social. Ndikimi i zgjedhjeve të shpeshta në ekonominë e Kosovës, edhe më herët sipas ekspertëve është vlerësuar negativ. Por kjo nuk ka ndryshuar politikëbërjen kosovare. Por ndryshim s’ka pas as perspektiva e qytetarëve karshi shtetit të tyre. Bile, në vend nga vitit në vit, është vërejtur një shtim i numrit të të rinjve që po e braktisin Kosovën, e që shumica prej tyre po shkojnë me viza pune nëpër vende të ndryshme të Bashkimit Evropian, shkruan PlusTV.

Për dallim prej ikjes masive që ndodhi gjatë vitit 2014-2015, ku mbi 100.000 qytetarë ikën ilegalisht nga Kosova drejt vendeve të BE-së, sot ky migrim po bëhet në mënyrë të rregullt duke shkuar me viza pune e ku shumica prej tyre ndalen në Gjermani.

Teksa shteti heshtë përballë këtij fenomeni e politikanët enden nëpër gara zgjedhore për vota e pozita thuajse çdo vit, me qindra fshatra anembanë qyteteve të Kosovës po braktisen nga djemtë dhe vajzat e reja, e numri i nxënësve po bie nëpër shkolla. Statistikat e institucioneve arsimore lokale tregojnë rënien e numri të nxënësve nga viti në vit. Politikanët lokal e ata në krye të Qeverisë e Kuvendit e dinë për këtë.

Qytetarët në përgjithësi shprehen të pakënaqur me drejtimin aktual politik të Kosovës. Disa të rinj të pyetur nga Plus TV, thonë se edhe me gjendjen e pandemisë të krijuar së fundmi, nuk shohin më perspektivë në Kosovë dhe me shumë dëshirë do të iknin nga këtu po të kishin mundësi. Papunësia e madhe vlerësohet të jetë edhe më tej arsyeja kryesore që po shtyn qytetarët të lëshojnë vendin por edhe pagesat e ulëta në tregun e punës.

“Në Kosovë u bo krizë, s’ka as punë e as paga të mira, tash edhe virusi ma mirë me dal jashtë, atje ka ma shumë perspektivë, do kisha ikur sepse këtu ne vendin tonë punët janë jo mirë”, tha një i ri L.B. Kurse, F. A, studente, tha se do të largohej nga vendi pasi këtu e ka të vështirë të punësohet dhe sektori privat, siç tha ajo nuk ofron pagë të mjaftueshme e dinjitoze. “Paga ne vendet jashtë Kosovës, është e mjaftueshme për të pagu qiranë, ushqimin, shpenzimet dhe për te bere qejfe, jete e deshiruar për të gjithë, mundësi më të mira të punës dhe jetesës”, tha ajo.

Njëjtë mendon edhe L. A, i cili ka kryer studimet dhe thotë se arsyeja e ikjes jashtë është se atje ka kushte dhe rend.

“Në Evropë si Zvicer e Gjermani, respektohet kontrata e punës, ka sigurim shëndetësor, kushtet janë më të mira për jetesë,” tha ai.

Sipas një raporti mbi migrimin të Ministrisë së Punëve të Brendshme, thuhej se për periudhën 2016-2018, Kosova ka humbur rreth 2 për qind të popullsisë së vendit. Në dekadën e fundit, më shumë se 220 mijë qytetarë të Kosovës kanë lëshuar vendin, sipas të dhënave zyrtare të Agjencisë së Statistikave të Kosovës. Numri më i madh i qytetarëve, të cilët kanë emigruar nga Kosova gjatë periudhës 2010-2018, u shënua në vitin 2015, kur nga Kosova u larguan mbi 75 mijë qytetarë. Ndërsa në vitin 2018, mbi 28 mijë persona vendosën të ikin nga vendi, ikja nuk është ndalur as në vitet 2019 e 2020.

Analistët dhe Shoqëria Civile, e shohin si shqetësuese numrin në rritje të të rinjve për të lëshuar Kosovën. Sipas tyre, kjo ka ardhur si pasojë e zhvillimeve jo të mira ekonomike, politike dhe sociale që po e përcjellin Kosovën, zgjedhjet e shpeshta të jashtëzakonshme, ndërrimi i qeverive dhe qeverisja jo e mirë. Ata thonë se është koha e fundit kur shteti duhet të marrë më seriozisht trajtimit e këtij fenomeni dhe të ofroj zgjidhje e zhvillim për qytetarët e vetë pasi sipas tyre janë përgjegjëse për këtë dukuri me përmasa alarmuese.

Sipas analistit Faton Mehmeti, fajtore për këtë gjendje janë institucionet dhe klasa politike.

“Politikanëve, ju duket absurde ikja, përderisa vet i kanë kushtet e jetesës shumë të mira. Ata nuk e shohin realitetin në tokë, jetojnë në një realitet tjetër, dhe kjo është fatkeqësi. Pikërisht janë këta politikanë që e kanë varfëruar popullin duke e zhvatur, janë bërë milionerë, deri popullin e kanë lënë në mëshirë të fatit. Nuk ka paturpësi më të madhe që t’u thuash të rinjve ” Nuk duhet të ikin” por pse të rinjtë të rrijnë për të punuar për 200 euro në muaj, me spitale të shkatërruar dhe shëndetësi të sëmurë, me arsim pa cilësi dhe të ardhme jo të sigurt, pse duhet të rri një i ri n’Kosovë, kur shteti nuk jep asgjë. Të rinjtë po pikin sepse perspektiva këtu mungon, dhe me të drejtë të rinia kërkon një jetë më të mirë jashtë. Në një shtet të kapur, ku e ardhmja është e zymtë, është krejtësisht e kuptueshme që të rinjtë ikin. Ata që deri sot kanë qenë në pushtet, janë arsyeja pse sot kaq shumë qytetarë braktisin vendlindjen”, u shpreh Mehmeti.

Ai mendon se zgjedhjet e shpeshta tregojnë mungesë të stabilitetit politik në vend.

Ndërsa, Kristijan Ramaj, nga Qendra për Demokraci Lokale (QDL), mendon se shteti ynë nuk ofron perspektivë e zhvillim profesional, për pjesë dërmuese të rinisë, përfshi këtu të kualifikuarit me shkollim universitar apo me shkollë të mesme.

I pyetur se a janë fajtore institucionet për këtë fenomen ai u shpreh: “Kjo është një pyetje e mire, por edhe më mirë do të ishte, pyetja se sa janë fajtore institucionet, për ikjen e të rinjve nga vendi. Sepse që janë është fakt i njohur për çdo të ri në vend. Kjo pasi që shteti ynë momentalisht nuk ofron perspektiv, për pjesë dërmuese të rinisë, përfshi këtu të kualifikuar me shkollim universitar apo me shkollë të mesme. Faji kryesor mendoj se është tek qasja e gabuar në tregun e punës, ku po ju jepet shumë pak mundësi që ata të tregojnë vërtet potencialin që kanë. Fare pak nga të rinjtë e të rejat, shohin të ardhme të qëndrueshme në Kosovë, sidomos kur bëhet fjalë për planet për të krijuar një familje, apo për të arritur deri tek pavarësia financiare, bazuar në rrethanat që rinia gjendet sot”, tha ai.

Rreth asaj se shumë të ri e të reja trajnohen për punë në Kosovë, dhe pastaj synojnë BE-në për punësim,

Ramaj thotë se shkak për këtë janë pagat e ulëta dhe mundësit e mira që ofrojnë vendet perëndimore.

“Sigurisht se këtu luajnë rol shumë faktor, nisur nga stabiliteti që shtetet e BE-së ofrojnë në çdo aspekt të jetës, përfshirë këtu edhe shërbimet publike. Faktori vendimtar është sigurisht ai ekonomik, pasi që një profesionist i trajnuar apo shkolluar në një fushë specifike në Kosovë, paguhet shumëfish më tepër në pjesë dërmuese të Bashkimit Evropian. Ka edhe nga ata që me vite të tëra tentojnë të punësohen në Kosovë dhe të zhvillojnë jetën këtu, por që vështirësitë për të gjetur punë, në profesionin që ata janë të kualifikuar. Kjo pasi që sektori publik punëson shpesh persona në baza partiake dhe familjare. Që detyron direkt rininë të braktisin vendin për një jetë më të mirë në BE, e të mos jenë më barrë për familjen”.

Lidhur me atë se si e sheh të ardhmen e shtetit nëse trendi i ikjes nuk ndalet, ai shtoi se kjo ka dy anët e medaljes.

“Nëse e marrim për nga ofrimi i shërbimeve publike apo private, nga spitalet deri tek riparimi i makinës, do të jetë më e vështirë të marrim një shërbim të cilësisë së lartë, kjo pasi që ekspertët e fushës nuk do të jenë këtu për të na ndihmuar, por po punojnë jashtë shtetit. Në anën tjetër, kualiteti i jetesës mund të rritet ndjeshëm, kjo pasi që punëdhënësit vendor, do të detyrohen të ofrojnë kushte e paga më të mira, për të stimuluar rininë të qëndrojnë këtu. Në aspektin ekonomik, vendi jonë gjithmonë ka gjetur mbështetje të jashtëzakonshme tek diaspora. Të cilët në baza periodike nga mërgata, kontribuojnë për familjarët e tyre në Kosovë. Mundësia për të jetuar për një kohë në Evropë, do të ishte një përvojë e mirë për çdo të ri. Për të mësuar atje një stil jete më ndryshe, më të organizuar dhe më dinamik, për t’u kthyer më vonë në Kosovë, me përvojat e fituara atje duke sjellë një frymë më evropiane,” tha ai për PlusTV.

Ramaj, në fund u shpreh se nga këto zgjedhje, votuesit kosovarë kërkojnë më pak premtime e më shumë punë nga politikanët e institucionet. Ndryshe, derisa numri i atyre që po ikin jashtë vendit vlerësohet të jetë i madh, në Kosovë nuk ka ndonjë statistikë të saktë për këtë numër.

BURIMI: PlusTV

Politikanët enden nëpër gara zgjedhore e Kosova po zbrazet, të rinjtë po ikin!

Kriza shëndetësore dhe ekonomike që erdhi si pasojë e pandemisë së koronavirusit, rriti interesimin e qytetarëve për të dal jashtë shtetit për punë e jetë më të mirë.

Policia e Rajonit të Gjilanit: Aktivitete javore në trafikun rrugor

Hyseni: Mbi 1 mijë e 500 fermerë marrin mbështetje nga komuna

Morina Bunjaku: Gjithëpërfshirja në Komunën e Gjilanit është e kënaqshme

Sun Garden Events

Hidromorava: Paguaj faturën e ujit në pikat e Postës së Kosovës!

Komuna e Vitisë dhe Krivo Palanka rikthejnë bashkëpunimin e mirë ndërinstitucional

Ministria e Financave: Kosova përfiton grant prej 9 milionë franga për mbrojtjen dhe menaxhimin e ujërave

Çeku: Mbrëmë u mbrojt shteti i Kosovës, racizmi nuk ka vend në sport

Racizmi dhe thirrjet anti-Kosovë në Rumani, një sulm ndaj vlerave të futbollit dhe dinjitetit të Kombëtares së Kosovës

Vazhdon pastrimi i lumenjve, përroskave dhe hapja e kanaleve në Viti