Dega e PDK-së në Gjilan, ka tubuar sot strukturat e saj për ta nisur, siç thonë, betejën për fitoren e radhës të Partisë Demokratike të Kosovës për zgjedhet e parakohshme parlamentare të 11 qershorit.
Në këtë takim, nga qendra mori pjesë nënkryetari i PDK-së Uran Ismajli, i cili duke folur për zhvillimet e fundit deri te rënia e qeverisë, theksoi se shkuarja tani në zgjedhje ishte e pandalshme për faktin se qeveria në krye me Isa Mustafën, përkundër mbështetjes së fuqishme që i dha PDK (madje më shumë se vet LDK-ja), nuk tregoi përformancën e duhur, duke mos pas guximin dhe vendosmërinë për marrjen e vendimeve të rëndësishme e të mëdha për Kosovën.
Pavarësisht se PDK ishte komode për ta vazhduar deri në fund mandatin e bashkëqeverisjes, sepse kishte dy pozitat më të larta të shtetit; presidentin dhe kryetarin e Parlamentit, sikur që edhe ministrat në qeveri i kishte më të mirët, ngecjet në zhvillimin e vendit nga qeverisja Mustafa, e bënë të pamundur bashkëqeverisjen më tutje, tha ai.
“Lidershipi i PDK-së i përgatitur dhe i sprovuar në rrugëtimin e gjatë e të rëndë për fatin e Kosovës, garanton Fillimin e RI si koncept real dhe i arritshëm për qytetarët tanë, mundësi të reja në mirëqenie dhe punësim dhe se ky mision po mirëpritet dhe përkrahet për fuqishëm gjithandej Republikës së Kosovës”, ka thënë ndër të tjera nënkryetari i PDK-së Uran Ismajli.
Ndërkaq kryetari i degës Zenun Pajaziti, duke falënderuar strukturat e partisë për angazhimin e vazhdueshëm, ka deklaruar se bashkërisht kemi arritur ta kthejmë një frymë dhe disponim tjetër për qytetarët e Gjilanit me angazhimin dhe punën maksimale të secilit nga ne, duke prezantuar alternativa më të mira për interesin e përgjithshëm të komunës.
“Me afirmitet mund të prezantojmë punët e mira dhe zhvillimet që i ka sjellë vendit Partia Demokratike e Kosovës. Prandaj, PDK bindshëm do ta këtë përkrahjen dhe besimin e qytetarëve dhe se fitorja është në duart tona”, ka thënë Pajaziti.
Nga ana tjetër strukturat e degës, shpërshfaqën gatishmërinë dhe entuziazmin e tyre për mobilizim të përgjithshëm, për siç u tha, për fitoren e padiskutueshme të Partisë Demokratike të Kosovës.
