Ministri i Tregtisë dhe Industrisë, Endrit Shala,ka pritur sot në takim ministrin e Turizmit dhe Mjedisit të Republikës së Shqipërisë, Blendi Klosi, bashkë me kryetarët e Bashkive të Vlorës dhe Himarës, Dritan Leli dhe Jorgo Goro.
Ministri Shala theksoi se me ministrin Klosi biseduam për thellimin e bashkëpunimit dhe për daljen e një oferte të përbashkët turistike.
“Diskutuam me ministrin Klosi për thellimin e bashkëpunimit në fushën e turizmit, kompetencë kjo që është në domenin e ministrisë që e drejtoj unë. Diskutuam edhe për mundësinë e krijimit të ofertave të përbashkëta, që turistët e huaj t’i kenë ofertat e përbashkëta për ata që vizitojnë Shqipërinë, ta vizitojnë edhe Kosovën dhe anasjelltas. U dakorduam që bashkë me Klosin që tur-operatorët nga Kosova dhe Shqipëri t’iu ofrojmë shtande të përbashkëta për promovim të turizmit dhe të ofertave që i kemi si dy shtete”, tha ministri Shala.
Ministri bëri të ditur se gjatë vitit Kosovën e vizitojnë afër pesë milionë vizitorë dhe afër 26 për qind janë nga Republika e Shqipërisë, ose mbi 800 mijë.
Ndërsa ministri Klosi tha se shumë qytetarë nga Kosova e kanë destinacion Shqipërinë gjatë sezonës së verës, duke theksuar se barrierat administrative nuk mund ta pengojnë turizmin.
“Ne nuk do duhet të mendojmë që deti është i shtetit shqiptar, ai është pasuri e gjithë kombit shqiptar. Ne duam të ofrojmë turizmin më të bukur të Shqipërisë dhe të Kosovës. Oferta e Shqipërisë dhe Kosovës nuk mund të pengohet nga barrierat administrative”, tha Klosi.
