Me rastin e përfundimit të vitit kalendarik 2018, sot Ministrinë e Mbrojtjes dhe Forcën e Sigurisë të Kosovës e vizitoi kryeministri i Republikës së Kosovës, z. Ramush Haradinaj me bashkëpunëtorë.
Në kazermën „Adem Jashari“, në Komandën e Forcave Tokësore të FSK-së, kryeministri u prit nga ministri i Mbrojtjes Rrustem Berisha, zëvendës ministri Burim Ramadani dhe komandanti i FSK-së, gjenerallejtënant Rrahman Rama.
Vizita e kryeministrit Haradinaj në FSK, ishte në kuadër të agjendës së tij, për të vizituar institucionet e Kosovës, që në ndërrimin e moteve punojnë, kur të tjerët festojnë.
Para të pranishmëve, kryeministri Haradinaj, u shpreh: „Me vizitën këtu, tek ushtria e Kosovës, i përmbylla vizitat e zhvilluara gjatë ditës. Vizitova zjarrfikësit, Policinë e Kosovës dhe tash Ushtrinë e Kosovës. Qytetaret e Kosovës mund të pushojnë të qetë. Ushtria e Kosovës është në detyrë edhe sonte.“ Në fund, kryeministri Haradinaj të gjithë ushtarëve, nënoficerëve dhe oficerëve të FSK-së, ua uroj Vitin e Ri 2019.
