Albin Kurti, kryeministër i Kosovës, i shoqëruar nga ministri Hajrullah Çeku, nga kryetari i Komunës së Gjilanit, Alban Hyseni, drejtori për Kulturë, Rini e Sport, në Gjilan, Kushtrim Zeqiri dhe shumë bashkëpunëtorë, ka qëndruar në shtëpitë e familjeve të Rexhep Malës dhe Nuhi Berishës dhe shtëpinë e Rexhep Malës e ka shpallur aset i mbrojtur i trashëgimisë kulturore.
Ilmi Ramadani, bashkëveprimtar i Rexhep Malës, i ka shpjeguar kryeministrit Kurti vendin ku ka qëndruar në ilegalitet Rexhep Mala, që ishte një lloj bunkeri, me hyrjen të mbuluar me dhe katër bazat e tjera duke qëndruar në to në ilegalitet në rrethanat e atëhershme.
Kryeministri Albin Kurti, në oborrin e shtëpisë së Rexhep Malës, bëri me dije se nga sot kjo shtëpi do të jetë një aset i trashëgimisë kulturore dhe e mbrojtur, e cila do të shndërrohet në muze.
“Në shekullin XX. Lëvizja Çlirimtare ka qenë shprehje tejet e rëndësishme e kulturës popullore në Kosovë dhe organizimi ilegal ka qenë infrastruktura e vullnetit të popullit për liri e për bashkim”, ka thënë kryeministri Kurti, që ka shtuar se prandaj ne tregojmë kujdesin tonë për trashëgimi kulturore, e cila vazhdon të na frymëzojë dhe në të njëjtën kohë na mbush me përgjegjësi për punët dhe detyrat që i bëjmë gjithnjë në frymën e idealeve të heronjve dhe dëshmorëve të kombit.
Kurti ka thënë se në këtë ditë, në 40-vjetorin e rënies heroike të Rexhep Malës e të Nuhi Berishës, kanë vizituar këto dy familje bashkë me bashkëveprimtarët e tyre. Ai ka thënë se disa baza kanë qenë në oborrin e shtëpisë së Rexhep Malës dhe ato kanë mundësuar organizimin e qindra e më vonë edhe të mijëra veprimtarëve, të cilët kanë dhënë gjithçka për Republikën e Kosovës dhe për bashkimin kombëtar.
Kryeministri Kurti ka shtuar se një bazë e rëndësishme ka qenë tek pragu i dyerve të oborrit, të cilën Rexhep Mala e ka ndërtuar pasi që ka dalë nga burgu, me mendjen e tij të mprehtë, duke llogaritur që edhe atëherë, kur forcat policore okupatore armike do t’i shtyjnë dyert e oborrit do të hyjnë me aq shpejtësi, sa që nuk do ta shikojnë pragun dhe pragu i shtëpisë është menduar mençur dhe drejt prej tij, si nj vend i sigurt për bazën e organizimit ilegal.
“Rexhep Malës dhe Nuhi Berishës, të gjithë ne i kemi aq shumë borxh për qëndresën e tyre, për organizimin e tyre dhe për flijimin e tyre”, ka thënë kryeministri Albin Kurti.
Hajrullah Çeku, ministër i Kulturës, Rinisë dhe Sportit, ka thënë se prej sot kjo shtëpi, që mbart shumë histori dhe që ka qenë një bazë shumë e rëndësishme e aktivitetit ilegal, patriotik dhe atdhetar të Rexhep Malës dhe të shumë shokëve të tij, është në mbrojtjen e shtetit dhe shpallet aset i mbrojtur i trashëgimisë kulturore, andaj ai ka falënderuar familjen Mala për bashkëpunimin që sot të merret ky vendim dhe së bashku me organet relevante do të nisin diskutimet për ta muzealizuar këtë shtëpi, këtë oborr me të gjitha elementet edhe historike edhe shpirtërore që i mbart me vete dhe edhe ky aset i shtohet listës së monumenteve të mbrojtura nga shteti dhe këtu do të dokumentohet nj periudhë dhe një aktivitet i rëndësishëm që lidhet me emrin e Rexhep Malës dhe me shumë emra dhe periudha të rezistencës atdhetare në vendin tonë. /2LONLINE/
