Nënkryetari i komunës së Gjilanit, Arbër Ismajli ka vizituar fermerin Brahim Hyseni, nga Velekinca e Gjilanit të cilin e ka përgëzuar për punën që po e bënë bashkë me familjen e tij, në mbajtjen e mbi 20 krerë lopë, në angazhimin e tyre për ta organizuar dhe rritur fermën e tyre, për çka ai tha se fermerët e përkushtuar do ta kenë përkrahjen e institucioneve, transmeton Portali 2LONLINE.com.
Ismajli u shpreh se është kënaqësi të takosh një familje të mirëorganizuar e punëtore, e cila mbi vete bartë përgjegjësi dhe nevojë, në mbajtjen e mbi 20 krerë lopësh. Dikur filluan me 5 krerë, por me punë dhe përgjegjësi, arritën ta zgjerojnë biznesin e tyre familjar, për t’u angazhuar në mbajtjen e mirëqenies së familjes së tyre.
“Ky fermer është Brahim Hyseni, nga Velekinca e Gjilanit. E gjithë familja e tij, është një familje e përgatitur në mënyrë profesionale, dhe, të gjithë janë orientuar në fillimin e rritjen e fermës së tyre. Ne, si komunë, ju kemi ndihmuar kohë pas kohe, sipas mundësive tona, këtij fermeri, dhe, të gjithë fermerëve tjerë, pasi që, konsiderojmë se kjo natyrë e punës, është e vetmja mundësi aktuale, për mbajtjen gjallë të familjes, e të ekonomisë së vendit”, ka thënë nënkryetari Ismajli, transmeton 2LONLINE.com.
Sipas tij, Gjedhëtaria është disiplina e rëndësishme e ekonomisë së një familje, nga e cila, blegtorët tanë, formësojnë gjendjen e tyre financiare, dhe, zhvillohen gradualisht, siç është rasti i Brahim Hysenit.
“E falënderoj Brahim Hysenin, për përkushtimin e tij të thellë, në investimin e fermës së tij, ku së bashku me familjen e tij, po arrijnë të ndërtojnë hapa të plotësimit dhe ndërtimit të mirëqenies së tyre”, ka thënë Ismajli për të shtuar se ky fermer është është vlerë e shtuar për vetë shtetin dhe se, çdo subvencion i ardhur për ta, do të kthehet në dobi të përmirësimit të ekonomisë së vendit tonë.
“Ndjekja e rrugës së Brahim Hysenit, i cili arriti nga zeroja, të ndërtojë atë që sot po e prezantojmë, është fuqia më e mirë e orientimit të një familje të tërë, e cila i ka fillet e ndërtimit në vetë-menaxhim dhe vetë-organizim të mirëfilltë familjar”, ka thënë nënkryetari i komunës së Gjilanit, Arbër Ismajli.
