Zyrtarët policorë nga Njësia Rajonale e Komunikacionit Rrugor në Gjilan, kanë marr veprimet e nevojshme policore duke ndaluar dy mjete transporti të zhavorit të cilët lëviznin në rrugë pa e siguruar paraprakisht me mbulesë ngarkesën e tyre.
Ismet Hashani, zëdhënës i Policisë së Kosovës (PK), në Drejtorinë Rajonale në Gjilan ka bërë me dije se në bazë të informatave të marra në rrugë operative përmes fotove janë identifikuar që të dy vozitësit e automjeteve dhe ndaj tyre janë ndërmarr masat komfor normave ligjore në fuqi.
Sipas tij, duke marrë parasysh situatën e krijuar, për shkak të motit me reshje bore, ngrica në rrugë, Policia Rajonale në Gjilan ka shtuar prezencën policore në të gjitha rrugët nacionale, magjistrale, rajonale dhe urbane në të gjithë rajonin e Gjilanit duke përfshirë komunat: Gjilan, Dardanë, Viti, Novobërdë, Kllokot, Ranillug, dhe Partesh me qëllim të parandalimit të aksidenteve rrugore.
“Policia apelon tek drejtuesit e automjeteve që të kenë pajisjet dimërore në automjetet e tyre, (zinxhir për goma), të kenë vendosur gomat e dimrit, ti kenë automjetet e tyre në gjendje të rregullt teknike, të përshtatin shpejtësinë e lëvizjes së automjetit, në raport me kushtet e rrugës, të mbajnë distancën e duhur mes automjeteve, të vendosin rripin e sigurisë dhe të mos përdorin telefonin gjatë drejtimit të automjetit”, ka thënë zëdhënësi Hashani.
Drejtoria Rajonale e Policisë në Gjilan, apelon tek shoferët e automjeteve që të respektojnë rregullat e komunikacionit rrugor.
“Drejtoria Rajonale e PK-së në Gjilan falënderon qytetarët dhe mediat për bashkëpunimin dhe inkurajon që ky bashkëpunim të vazhdoje me policinë për të gjitha kundërvajtjet që mund të vërehen në komunikacion, të njoftojnë menjëherë policinë, stacionin më të afërt, apo përmes aplikacionit digjital ‘’Lajmëro Policinë ‘’ dhe në numrat kujdestarë : 192 dhe 038 – 50807095”, thotë Hashani. /2LONLINE/
