Në muzeun e qytetit të Gjilanit, u hap ekspozita e pesë nxënësve të shkollës së arteve pamore “Adem Kastrati”, e cila gërshetoj tri mediume të artit, poezinë, kaliografinë dhe ilustrimin.
Nxënësit: Mirjeta Keka, Albina Avdiji, Kaltrina Maliqi, Albnor Sejdiu dhe Ermira Demolli, shpërfaqën prirjet e tyre përmes mediumeve të caktura artistike nga letërsia dhe arti pamor, ku secila poezi është përcjellë me ilustrim dhe bukurshkrim, disiplina dhe talenti i tyre të veçantë, për të cilën, shquhen këta nxënës, transmeton Portali 2LONLINE.com.
Aktiviteti u realizua me prani të kufizuar të nxënësve, mësimdhënësve, përfaqësuesve të DKA-së dhe Muzeut të Qytetit.
Drejtori i shkollës, Roland Masurica, në hapje të kësaj ekspozite, falënderoi të gjithë të pranishmit, me këtë rast uroi autorët e ekspozitës për kreativitetin e tyre artistik dhe njëherit duke inkurajuar të gjithë të rinjtë të cilët artin e përcaktojnë si udhërrëfyes në karrierë.
Masurica, potencoi se tashmë Galeria e Arteve Pamore është në përfundim të punimeve finale dhe po bëhet një realitet, të cilën do ta gëzoj komuniteti artistik.
Fjalë rasti mori edhe drejtori i arsimit në Gjilan, z. Nazim Gagica, i cili u shpreh i ngazëllyer me këtë paraqitje të nxënësve të shkollës së arteve, theksoj se Drejtoria Komunale e Arsimit do të jetë gjithnjë në mbështetje të nxënësve dhe aktivizimit të tyre, të cilët përmes talentit dhe prirjeve na ofrojnë lumturinë.
Ndërsa, drejtoresha e muzeut të qytetit, Gjylishene Berisha, nga këndvështrimi i një gjuhëtareje e vlerësoi lart punën e nxënësve, duke shtuar se muzeu i qytetit do të jetë gjithherë hapësirë e cila promovon vlera kulturore dhe artistike.
Prof. Jeton Rexhepi, kryetar i aktivit profesional të shkollës së arteve, uroi nxënësit pjesëmarrës në këtë ekspozitë, të cilët, sipas tij, treguan pjekuri artistike. Ekspozita do të mbetet e hapur për vizitorë deri më 02 prill. /2LONLINE.com/
