Deputetët e Kuvendit të Kosovës e mbështetën në parim Projektligjin për veteranët e Ushtrisë Çlirimtare të Kosovës, të cilin e prezantoi kryeministri Hashim Thaçi. Kreu i Qeverisë tha se këto beneficione përcaktohen me ligj për shkak të nderit dhe respektit që veteranët gëzojnë në popull dhe si njohje e sakrificës së tyre sublime.
Data 30 dhjetor do të përcaktohet si Dita e Veteranit. Kjo është përcaktuar në Projektligjin për veteranët e UÇK-së, të cilin në Kuvend e prezantoi kryeministri Hashim Thaçi. Ai tha se qëllimi i nxjerrjes së këtij ligji është përcaktimi i të drejtave dhe beneficioneve të veteranëve të UÇK-së dhe anëtarëve të ngushtë të familjeve të tyre, transmeton RTK.
“Realizimi i të drejtave në beneficione të përcaktuara me ligj bëhen për shkak të nderit dhe respektit që gëzojnë në popullin e Kosovës dhe më gjerë. Veteranët e UÇK-së të cilët me sakrificën e tyre sublime dhanë kontribut të lartë, udhëhoqën luftën çlirimtare me karakter mbrojtës dhe çlirimtar dhe me qëndrimin e tyre të ndershëm dhe patriotik janë shembull për brezat e ardhshëm”, u shpreh Thaçi.
Anton Çuni nga LDK-ja i dha mbështetje në emër të grupit, por kërkoi që ky ligj të jetë gjithëpërfshirës, e mos të jetë përjashtues në aspektin kohor e organizativ.
“Duhet krahas komandave të zonave dhe shtabit të përgjithshëm të radhitet edhe Ministria e Mbrojtjes e Republikës së Kosovës, si një nga akterët e rëndësishëm të organizimit, mobilizimit, mbështetjes dhe ekzekutimit të operacioneve për çlirimin e territoreve të Kosovës”, tha Çuni.
Edhe Faton Topalli nga Vetëvendosje i dha mbështetje projektligjit, siç u shpreh ai, për shkak të veteranëve, jo pse projektligji është i mirë.
“Ky ligj është i mirë për vota, por jo për ndihmë të mirëfilltë dhe vlenë vetëm para zgjedhjeve, por nuk garanton zbatueshmëri pas zgjedhjeve”, tha Topalli.
Edhe grupet tjera parlamentare i dhanë mbështetje projektligjit për veteranët e UÇK-së, me të cilin rregullohet çështja e kategorizimit të veteranëve të UÇK-së, përfshi edhe procedurat e konstatimit të statusit të veteranëve të UÇK-së. Po ashtu, me këtë projektligj përcaktohen edhe të drejtat në beneficione për veteranët dhe familjarët e tyre, siç është pensioni personal i veteranit, pensionet e trashëgimtarëve, e drejta në shërbime shëndetësore falas, përparësia në punësim dhe beneficione të tjera.
