Sfidat me të cilat po përballen bizneset në raport me Ministrinë e Bujqësisë, Pylltarisë dhe Zhvillimit Rural (MBPZHR) dhe nevoja urgjente për ndryshimin e disa udhëzimeve administrative dhe ligjeve ishin tema kryesore e diskutimit në vazhdën e aktivitetit “Kafja e Mëngjesit” organizuar nga Oda e Afarizmit të Kosovës (OAK), ku përveç bizneseve, i ftuar ishte edhe Ministri Besian Mustafa.
OAK falënderoi Ministrin Mustafa për bashkëpunimin e treguar deri më tani, fryt i së cilës ishte edhe ndryshimi i Udhëzimit Administrativ 10/2010, e ndër të tjera kërkoi që së bashku të lobojnë në maksimum për ndryshim të ligjeve dhe udhëzimeve tjera, që po pengojnë zhvillimin e sektorit privat në vend.
Ministri Mustafa falënderoi bizneset për interesimin e shprehur dhe theksoi që reformat legjistlative preferon të bëhen përmes ligjeve, e jo udhëzimeve administrative, duke shtuar që aktualisht janë në përfundim të ligjit për bujqësi dhe zhvillim rural dhe ligjit për pyje. Ai shprehu gatishmërinë për diskutim të hapur me bizneset, duke shtuar që kështu mund të arrihet më lehtë në identifikimin e nevojave që bizneset kanë dhe zhvillimin ekonomik të vendit.
Gëzim Selimi nga Industria e Mishit Calabria kërkoi mbështetje për investimet që janë duke planifikuar si kompani si dhe përkrahje shtetërore për prodhuesit vendor.
Ramadan Gashi nga “AG Group” theksoi rëndësinë e krijimit të zonave ekonomike në tokat pyjore në mënyrë që të mos dëmtohen tokat bujqësore dhe që komunat të kenë mundësi të pajisen me zona ekonomike.
Fatos Hysenaj nga “Vëllezërit e Bashkuar” theksin i vuri tarifave të larta që bizneset e sektorit minerar duhet të paguajnë.
Kurse Bedri Llapashtica nga “Prestige Media” theksoi që bujqësia zhvillohet kryesisht nga bizneset e vogla andaj është më se e nevojshme përkrahja e tyre, në këtë formë eleminimi i burokracive dhe procedurave për këtë kategori është i nevojshëm në mënyrë që bizneset të mos hezitojnë të aplikojnë për grantet dhe subvencione pasiqë vullneti për zhvillim ekziston. Ndër të tjera ai theksoi edhe mungesën e ofertës për të bërit biznes në vend, si rezultat i së cilës shumë investitor potencial po ikun nga Kosova për të shkuar në vendet e rajonit.
Burim Piraj nga “Meka” SH.P.K. u fokusua tek vështirësitë me të cilat po përballen bizneset në komunat rurale si dhe mungesën e rrugëve të hapura dhe elektrifikimin në bjeshkë.
Agron Krasniqi nga “Luna” SH.P.K. kërkoi që bujqit të lirohen nga akciza në derivate si dhe të përkrahet ngrohja me derivate, ashtuqë të eleminohet ajo me dru dhe të mbrohen pyjet vendore.
Sipas Ministrit Mustafa, grantet e zhvillimit rural këtë vit për herë të parë do të paguhen 50% në avancë, ndërsa veçoi që janë duke tentuar që udhëzimet administrative të jenë sa më të thjeshta për kuptim dhe zbatim. Ndër të tjera ai shtoi që janë bërë lehtësira në aplikimi për grante dhe subvencione duke eleminuar deri në 60% të dokumenteve që kërkohen për aplikim, duke shtuar që këtë vit aplikimi do të bëhet online për herë të parë, platformë kjo e mbështetur nga Banka Botërore e që do të paraqes reformë në këtë aspekt.
OAK falënderon Ministrin Mustafa për bashkëpunimin e vazhdueshëm dhe gatishmërinë e tij për të qenë sa më afër komunitetit të biznesit dhe rritjes së partneritetit publiko – privat.
