/GJILAN: ZHEGRA – PRISHTINA 27:44 (16:24)/
(2L ONLINE)- Hendbollistët e Zhegrës nuk kanë mundur ti bëjnë më shumë ballë kampionit në fuqi, Prishtinës duke u mposhtur bindshëm atë me 17 gola diferencë. Kështu prishtinasit kthehen në korsinë e fitoreve pas barazimit ndaj Besa Famiglias dhe vazhdon rrugëtimin drejt mbrojtjes së titullit.
Falë një loje të shpejtë në fazën e sulmit, djelmoshat e Taip Kabashit u treguan fatal për vendasit që nuk iu ndihmoi as rikthimi i Alban Hazirit që ishte sërish më i dalluari në radhët e zhegranëve.
Prishtina e nisi furishëm ndeshjen duke treguar qysh në fillim të ndeshjes superioritet, pasi vetëm pas pesë minutave lojë epërsia shkoi mbi pesë gola. Deri në fundin e pjesës së parë bardh e kaltërit vetëm sa shtuan ritmin e golave dhe me epërsi prej 8 golave shkuan në pushimin mes dy pjesëve, (16:24).
Pjesa e dytë e lojës u karakterizua me faula të shumtë dhe përjashtime duke u ofruar kështu shikuesve hendboll të hapur dhe me aksione të shpejta.
Në këtë aspekt kampionet në fuqi ishin dominant pasi shfrytëzuan pothuajse çdo mundësi që kishin, kur kësaj ia shtojmë edhe pritjen e tre penaltive të ‘gardianit’ Dobroshi atëherë rezultati pa dyshim se do të ishte fatal për vendasit, (27:44).
Katalizatorë të kësaj fitore për Prishtinën ishte pothuajse e gjithë skuadra, pasi 10 lojtarët në fushë realizuan që të gjithë, ndërkohë që portierët e kryen detyrën e tyre. Me numër të madh golash u dallua Oltion Beshiri me 8 sosh dhe Florim Hoxha me 7, ndërkohë Alban Haziri te Zhegra njëherit ishte edhe lojtari më i dalluar në ndeshje pasi realizoi 13 gola
BOX:
Palestra e Sporteve ‘’Bashkim Selishta – Petriti’’
Shikues:
Gjyqtarë: A.Vitaku, E.Vitaku
Delegat: Istref Sadriu
Përjashtimet: Zhegra 8min – Prishtina 8min
Shtatëshet: Zhegra 5/2, 6/5
Zhegra: Agushi, Imeri, A.Haziri 13, Osmani, Jakupi, Ramadani 1, Shaqiri, S.Haziri 2, Emini 7, Isufi 2, D.Haziri 1, Aliu 1. Trajner: Armend Misini.
Prishtina: E.Gashi, Dobroshi, Ismajli 1, A.Gashi 2, Hoxha 7, Mjeku 4, Gjuka 4, Terziqi 4, Llapashtica 4, Beshiri 8, Shabanaj 3, Prekazi 7. Trajner: Taip Kabashi.
Drilon SYLEJMANI/2L ONLINE/
