Qytetarët e komunës së Vitisë, ditëve të fundit kanë pasur mungesë të furnizimit të rregullt me ujë të pijshëm nga Ujësjellësi “Hidromorava” në Letnicë. Gjatë ditës së sotme qyteti dhe zonat tjera, janë zgjuar pa ujë që në orët e para të mëngjesit.
Kemur Mustafa, zyrtar përgjegjës nga Ujësjellësi për Viti, ka thënë se reshjet e fundit të shiut kanë shkaktuar turbullira në rrjetin e ujësjellësit dhe për këtë arsye janë detyruar ta ndërpresin furnizimin për zonat e shërbimit.
Ai i kontaktuar nga Plus Televizion, ka thënë se janë duke punuar në pastrim dhe pasi të arrijnë cilësinë e duhur të ujit do ta funksionalizojnë furnizimin e rregullt.
Sipas tij, në mesditë pritet të kthehet furnizimi i rregullt me ujë të pijshëm. “Posa të bie shkalla e turbullirës së ujit, furnizimi me ujë të pijshëm do t’i kthehet normalitetit gjatë ditës,” tha Mustafa.
Ai ka thënë se nuk mund ta lëshojnë ujin pa u siguruar se plotëson 100 përqindë kushtet për pije.
Mustafa shtoi se pas kthimit të furnizimit me ujë, nuk do të aplikojnë reduktime pasi është rritur niveli i ujit pas reshjeve të fundit në vend.
Kujtojmë se, Ujësjellësi i Vitisë, nga burimet në Letnicë, përherë pëson trubullira sa herë që ka reshje atmosferike dhe deri tash nuk ka pas investime në tejkalimin e kësaj situate nga ana e institucioneve përkatëse dhe qytetarët janë përballur me mungesë të ujit.
Ndryshe, KRU “Hidromorava”, ditë më parë përmes një komunikate, ka apeluar që konsumatorët të bëjnë pagesat e ujit me kohë dhe ta kursejnë atë.
BURIMI: PlusTV
