Lëvizja Vetëvendosje, në kuadër të fushatës zgjedhore për Zgjedhjet Nacionale 2017, ka mbajtur një takim me punëtorë të arsimit, në të cilin është prezantuar një pjesë e programit e që ka të bëjë me arsimin.
Besa Baftiu, kandidate për deputete, ka thënë se qytetarët po deklarohen për ndryshime e arsimi kërkon ndryshime. Sipas saj, arsimi është lëmi e rëndësishme, andaj ajo ka kërkuar që të përkrahen kandidatët e vetëvendosjes, duke kërkuar që një votë të shkojë për Albin Kurtin e katër të tjera për kandidatët e VV-së nga Gjilani.
Ismajl Kurteshi, kandidat në listën e VV-së, ka theksuar se askush nuk është i kënaqur me gjendjen në arsim e VV ka projekte për të ndërruar këtë gjendje. Sipas tij, arsimi duhet të jetë me prioritet nacional dhe tri janëçështjet kryesore sa i përket arsimit: ndërtimi i 160 çerdheve për fëmijë, shkollat profesionale dhe shkollimi falas për të gjithë.
“VV ka program e të tjerët kanë premtime”, ka thënë Kurteshi, kurse Arjeta Rexhepi, kandidate për deputete, tha se duhet një ndryshim i madh dhe fëmijët të mos lihen keq. Ajo si të mirë ka përmendur punën në Prishtinë dhe tha se me fitoren e VV-së do të bëhen ndryshime edhe në nivel vendi.
Nevzad Isufi, kandidat tha se pushteti i deritashëm nuk ka ofruar cilësi në arsim, andaj ka kërkuar që të largohen metodat e ulëta dhe joedukative dhe që t’i lihet vend edukimit të drejtë të brezave.
Edhe kandidatët për deputetë Sami Kurteshi e Shemsi Syla, patën vërejtje në cilësinë e arsimit të tashëm dhe përpos arsimimit përmendën edhe rëndësinë e edukimit.
Mësimdhënës pjesëmarrës në debat kërkuan ndryshime rrënjësore në arsim. Ajvaz Beqiri, drejtor në shkollën e Mihirit, tha se besojnë fuqishëm në VV dhe është mirë që VV ka program që ka të bëjë me arsimin. Enver Rexhepi, mësimdhënës i biologjisë, tha se kjo qeveri e ka penguar zhvillimin e arsimit dhe se po krijohen kuadro që do t’a kenë shumë të vështirë që të punësohen, duke e cekur se arsimi i ynë ka nevojë për profile të natyrës e Murat Morina, mësimdhënës i matematikës, tha se nxënësit tanë individualisht po tregojnë suksese, por jo edhe në mënyrë të organizuar.
*Hapësirë e sponsorizuar – Zgjedhjet Nacionale 2017
