Instituti Kombëtar i Shëndetit Publik sot ka konfirmuar rastin e parë pozitiv me virusin COVID-19 në Komunën e Kamenicës.
“Pas rastit të parë pozitiv me Covid-19 në komunën tonë, konkretisht në fshatin Topanicë, Ministria e Punëve të Brendshme dhe Administratës Publike, e ka shpallur këtë fshat si zonë karantinë. Kjo pasi dyshohet se personi i dyshuar ka pasur kontakt të drejtpërdrejtë me banorët tjerë”, ka bërë me dije, Qëndron Kastrati, kryetari i Komunës së Kamenicës.
Sipas tij, për luftimin e kësaj pandemie nuk mjafton vetëm karantinimi i një zone të caktuar, por këtë duhet ta bëjmë të gjithë.
“Të rrimë në shtëpitë tona në secilën pjesë të komunës. Nuk duhet të mendojmë që rreziku prej infektimit me këtë virus është i izoluar vetëm në Topanicë dhe ne të tjerët jemi të sigurt. Nuk guxojmë të mendojmë që të infektuar janë vetëm rastet e konfirmuara. Rri n’shpi për veten dhe familjen”, thotë kreu i Kamenicës, Qëndron Kastrati.
