Shurdhani: Mos i përgjithësoni dhe mos i paragjykoni organizatat, merreni guximin dhe adresoni me emër!
Fatmir Shurdhani, menaxher i Handikosit në Gjilan ka reaguar ndaj deklaratës së kreut të AAK-së në Gjilan, Nazim Gagicës, në lidhje me organizatat joqeveritare, se janë në rrjedhën e pushtetit – pjesë e fushatës, por jo të misionit…
“Deklarata e kryetarit të Aleancës për Ardhmërinë e Kosovës, z. Nazim Gagica, i cili përgjithëson me lehtësi të padurueshme kur deklaron se “organizatat joqeveritare dhe shoqatat e ndryshme që historikisht janë thirrur në shërbim të komunitetit, po shndërrohen gjithnjë e më tepër në paterica të pushtetit aktual”, është e papranueshme dhe dashakeqe. Cilave organizata e shoqata po i referoheni, përse nuk e keni guximin t’ua qitni emrat?!”, thotë në reagim, Fatmir Shurdhani.
Ja reagimi i tij i plotë:
Reagim ndaj deklaratës së kryetarit të AAK-së, z. Nazim Gagica
Deklarata e kryetarit të Aleancës për Ardhmërinë e Kosovës, z. Nazim Gagica, i cili përgjithëson me lehtësi të padurueshme kur deklaron se “organizatat joqeveritare dhe shoqatat e ndryshme që historikisht janë thirrur në shërbim të komunitetit, po shndërrohen gjithnjë e më tepër në paterica të pushtetit aktual”, është e papranueshme dhe dashakeqe.
Cilave organizata e shoqata po i referoheni, përse nuk e keni guximin t’ua qitni emrat?!
Unë mund të flas në këtë rast për organizatën që merret me trajtimin e personave me aftësi të kufizuar “Handikos”, e cila nuk i është bërë kurrë patericë asnjë partie politike.
Për rrjedhojë, të gjitha partitë politike e kanë pasur derën e hapur dhe do ta kenë në vazhdimësi, për bashkëpunim, për të mirën e përgjithshme.
Si bartës i Handikosit në Gjilan, unë kam qenë, jam dhe do të jem gjithmonë zëri më i fuqishëm i personave me aftësi të kufizuara, por kurrë zë i politikave ditore të askujt.
Për fund, sërish po ua përsëris, i nderuari z. Gagica, mos i përgjithësoni dhe mos i paragjykoni organizatat. Merreni guximin dhe adresoni me emër.
Sinqerisht,
Fatmir Shurdhani,
Menaxher i Handikosit – Gjilan