Nazim Gagica: Organizatat joqeveritare, në rrjedhën e pushtetit – pjesë e fushatës, por jo të misionit

“Në prag të zgjedhjeve lokale dhe me përcaktimin e datës së tyre, kemi filluar të vërejmë një fenomen shqetësues: organizatat joqeveritare dhe shoqatat e ndryshme që historikisht janë thirrur në shërbim të komunitetit, po shndërrohen gjithnjë e më tepër në paterica të pushtetit aktual”, thotë Nazim Gagica, kryetar i Aleancës për Ardhmërinë e Kosovës (AAK), dega në Gjilan.

Sipas tij, kjo dukuri nuk është thjesht tendencë, por tashmë është bërë praktikë e dukshme. Në vend që të ruajnë neutralitetin dhe integritetin qytetar që duhet t’i karakterizojë, shumë prej tyre po i vihen në shërbim një subjekti politik – vetëm sepse është aktualisht në pushtet. Dhe kjo nuk ndodh në heshtje – ndodh përmes aktiviteteve të përbashkëta, përmes promovimit të njëanshëm, e deri tek përfshirja e drejtpërdrejtë në fushatë.

“Pyetja është: pse ndodh kjo?. Përgjigjen ndoshta e gjejmë në dobësimin e mekanizmave të pavarësisë, në mungesën e transparencës, në vartësinë nga subvencionet apo në ambicien për favore të ardhshme. Por mbi të gjitha, përgjigjen duhet ta kërkojmë te vetë komuniteti”, thotë Gagica i AAK-së.

Ai shtoi se kur një OJQ apo shoqatë devijon nga misioni i saj, nuk është thjesht dështim etik – është mashtrim ndaj komunitetit që ajo pretendon ta përfaqësojë. Sepse asnjë organizatë nuk është themeluar për t’i shërbyer një partie, por për të qenë zëri i qytetarëve dhe mbikëqyrësi i pushtetit, cilido qoftë ai.

“Sot, më shumë se kurrë, kemi nevojë për organizata të forta, të paanshme dhe me integritet. Organizata që flasin kur duhet, kritikojnë kur është e nevojshme dhe i qëndrojnë besnike vetëm një pale – komunitetit. Kur shërbimi kthehet në shërbyes, humbet besimi qytetar”, ka thënë kreu i AAK-së së Gjilanit, Nazim Gagica, njëherësh anëtar i Kuvendit Komunal të Gjilanit.  /2LONLINE/