S I N O N I M I
(Agim Ramadanit)
Mehmetali Rexhepi
rrotulluese sjellën agimet që venin e shkonin të ftohta vesë-tharëse akulluese
pos në inserte ëndrrash dukej e nuk prekej Ajo Nuse
përtej shqipes e vishnin me kostumet e modës të stinëve
ngjyrat i derdhte e për habi nuk i shihnim veç rutinës
të gjitha shtjellimet të gjitha ligjërimet të gjitha fluturimet
të gjitha ngërthesat digjeshin e kundërmonin nën saçin e verës
edhe tepsia e njëjtë menyja e shijes si në krye të herës
dhe nuk ngurronim t`i hanim kokat siç na i hanë sot kokrrat
me pirunë të mërisë tjerrkej kanuni e dokrrat
një doktrinë “gacash” e solli Sinonimi i zbardhjes
*
agimet rrotulloheshin të hirta
i pandalshëm muzgu
e njëjta rutinë shtrohej shtretërve të fortë
mbulesa ankthesh dhe gjumi
Ai i përjashtuari nga ajo klasë rutine
kishte vjelë e vjelë gjithë ato ngjyra agmie
t `ua shtronte e t`ua ndezte t`ua joshte ato shikime lirie
hapësirave fluturuese të shqiponjave
të Një Kastrioti të Një Buletini të Një Hasan Prishtine
*
tabloja vigane e një Agimi ngjizej në frymëmarrjet e Sinonimit
kur pa se peneli mbi të zezën e theksuar
nuancat nuk zbardhnin dot atë udhë
të gjitha të panatyrshmet e kufirit
ia tkurrnin ngjyrat ndaj mori vendimin
t`i hidhej tablosë e përskuqura me krisma
*
kaherë në shpirtin e Tij copë e grimë ishte thyer
miti i pathyer
kaherë një Koshareje fytyrën grykë-topave mizorë ua kishte kthyer
Ajo fytyrë Ai portret
sikurse të gjithë të madhërishmit prore i kthjelltë
është prilli është maji vetë
vështron nga amshimi vdekatarët
të marrët
se si i zhveshën kostumet që ia kishte veshur Ai Lirisë
*
më fal Sinonim i Bardhësisë
lotët nuk mi shpifin ndjesitë
më fal
të lutem më fal
pengu i jetës më rikthen tek burimi Yt kristal
tek lartësia e malit
tek shiu i mallit
tek pjelloria e arave Tua të majit
*
më fal Agim ose Ngadhënjim
ngjyrë e cakut Tënd të prekur
ngjyrë e ëndrrës sime të mekur
fjalori im i hapur i dhimbjes së fshehur
fletë pas flete shikimi Yt mëkues e shigjetues
*
më fal
dhe më lejo t`i them “ndal” në emrin Tënd
bukurisë së dehur
siç i the “Shigjetës”
të thyer në shkëmbin e trupit Tënd
*
Agim
përjetësi shenjtërie e fjalësit tim
