Shqiptarëve nga Kosova, që po qëndrojnë në tenda nën një urë të Lionit, u është dhënë leja e qëndrimit deri në muajin mars, kur do të vendoset përfundimisht nëse do t’i kthejnë ose do të mbeten në Francë.
Ata kanë të drejtë të vazhdojnë qëndrimin, por jo më në këtë vend të Lionit, nën një urë të autostradës, ku po qëndrojnë të strehuar prej muajsh.
Më shumë se 300 refugjatë nga Kosova duhet të strehohen për të kaluar kohën e ftohtë të dimrit në një vendbanim më të sigurt, ka vendosur prefektura e Lionit, bën të ditur Euronews në një raportim të gazetares së tij, transmeton albinfo.
Kronika televizive tregon një grua nga ky kamp i improvizuar, e cila ankohet për kushtet e mjerueshme në të cilat po jetojnë kosovarët.
“Kemi shumë probleme këtu. Vajza ime është e sëmurë, ashtu si dhe bashkëshorti im. Ne po jetojmë prej katër muajsh në këto kushte”.
Refugjatët, në këtë vend jo larg nga qendra e qytetit, po jetojnë pa tualete, rrymë elektrike dhe ujë.
Një kalimtar rasti, i pyetur nga gazetarja, thotë: “Ndjehem keq të shoh këto pamje varfërie këtu. Nëse do të gjendet një zgjidhje tjetër për këta njerëz, do të ishte shumë gjë e mirë”.
Refugjatët shqiptarë nga Kosova do ta braktisin këtë kamp brenda tri javësh. Por, pasiguria për atë se çfarë do të ndodhë më tutje me ta mbetet edhe më tej.
“Sëmundje, uri dhe dëshpërim. Në këto kushte jetojnë refugjatët në Lion. Gjendja e tyre në një vendstrehim tjetër do të përmirësohej përkohësisht. Por, pas kalimit të dimrit, do të vendoset nëse ata do të dëbohen ose do të mbeten në Francë”, komenton gazetarja e Euronews.
Ekipi i Albinfo.ch ka realizuar një reportazh me kosovarët, që po qëndrojnë në tenda nën urën e Lionit. /telegrafi/
