(2L ONLINE) – “Përtej Poleve të jetës”, është vëllimi poetik i autorit , tani më të ndjerë”, Fehmi Korça , që është përuruar para gjilanasve, dashamirë të fjalë poetike. “Murlani i jetës” ishte poezia e cila hapi këtë ngjarje kulturore në Gjilan, e cila u deklamua nga Gentjan Banaj, poeti Fierak, për të vazhduar me refleksionin “pasaporta e pasjetës e Fehmi Korçës”, mbi këtë libër, që e paraqiti Valentina Dafa, redaktore e librit.
Dafa tha se koha dyvjeçare e ngjizjes së vëllimit poetik “përtej poleve të jetës”, dhe përfshirjes në veperimtarin kulturore (Gjermani-Shqipëri-Kosovë), na bënë të kuptojmë se Fehmi Korça filloi të mendojë se krijimtaria artistike ishte leva e Arkimedit për të mbushur shpirtin me një tjetër frymë, duke e ushqyer me artë.
“Ai diti që me fjalën të përcjellë përvojën e qenies në trajektoren ekzistenciale që përshkon shtegtimin në kohë dhe në hapësirë, ai diti ti shpërthejë matricat e brendësisë shpirtërore që përplaseshin për sfidë”, ka thënë Dafa.
Ajo shtoi se në fizionominë e krijimtarisë së Fehmi Korçës, s’kemi të bëjmë me një rrjedhë të ekuilibruar në prurje, por me vrulle klithmash që ndërtonin dhe përsosnin unin e tij, në art, unik lirik, që tani po dukej qartë duke u larguar gjithmonë e më shumë krijimtarisë formale dhe përsiatjeve.
“Në vëllimin e parë “Nuk jam larg”, dukeshin rrënjët e brishta të krijimtarisë , një krijim i kërkuar që nuk kishte të bënte me dhunti, por me mendim të kultivuar sipas rrethanave jetësore, pra thjeshtë, poezi e rrethanave. Ndërsa në këtë vëllim i ndeshim më të përzgjedhura ekstraktet jetësore, ndeshim motive reale, të cilat trajtojnë aspekte të ndryshme sociale, historike,,, të shprehur shumë thjeshtë, ndaj dhe rryma lirike e Fehmi Korçës bëhet tërheqëse e gjithëpërfshirëse, ndeshim një poezi pothuaj të arrirë , poezi me bosht rreth të cilës ndërthuren këndshëm gjithë elementet e krijimit poetik”, ka thënë ndër tjerash redaktorja e këtij libri Valentina Dafa.
Ndërsa, krijuesi Sarë Gjergji ka thënë në fjalën e tij se Fehmi Korça përmes një shprehjeje të sinqertë e toni kritik , vjershat e tij vijnë si një reagim ndaj dukurive destruktive e johumane të kohës, që për bazë kanë referenca , para se gjithash, të karakterit politik,
“Në këtë kontekst poezia e Fehmiut ngreh shqetësime, dilema e pikëpyetje të rëndësishme, që lidhen me ekzistencën dhe fati ne njeriut tonë. Në ktë frymë poezia e tij është një rrëfim, një dramë mbi fati ne njeriut të “ikur” (detyrimisht), nga vetvetja, siç është edhe fati i mërgimtarit”, ka thënë Gjergji.
Ai shtoi edhe se poezi të kësaj natyre janë përplot emocion dhe n vete ngërthejnë dhembjen, mallin dashurinë ( për atdheun e munguar), përmes figurave e simboleve të gjetura, herë-herë, artistike e poetike, një ligjërim, një këngëtim i frymëzuar mbi jetën e mërgimtarit.
“Siç e kuptojmë nga vargjet e tij , jo rrallë, të ngritura n shkallë sugjestive e asociative, ai në përngjasim me Anteun, është i lidhur ngusht me tokën dhe njerëzit e tij, prej nga i vjen e gjithë forca, i gjithë kuptimi i jetës, përkundër vështirësive e mynxyrave të shumta që përjeton çdo ditë edhe vet ai”, ka thënë ndër tjerash Sarë Gjergji.
Për autorin përkatësisht për librin e tij “Përtej poleve të jetës folën edhe odn Lush Gjergji e Tahir Arifi”, ndërsa poeti fierak Gentjan Banaj, që njëherësh është edhe recensentë i librit, përveç deklamimeve të disa poezive të Fehmi Korçës, ka shpalosur disa mendime rreth krijimtarisë së Korçës, por edhe ka prezantuar biografinë e autorit.
Ndërkohë që është thënë shkurtimisht edhe ajo se si e kanë parë të tjerët krijimtarinë përkatësisht librin në fjalë të Fehmi Korçës, që janë mendime pjesë e librit, si Don Lush Gjergji, Petraq Kote, Fran Ukcama,Hasan Bunjaku, Faton Bislimi e të tjerë.
Një mirënjohje postmortum për autorin Fehmi Korça, iu nda nga komuna e Gjilanit përkatësisht nga kreu i komunës Lutfi Haziri, që nga drejtori i Kulturës Bujar Haziri iu dha bashkëshortes së poetit të ndjerë.
Përndryshe, po e sjellim për lexuesin e portalin 2L ONLINE, edhe poezinë e cila hapi këtë ngjarje kulturore .
Murlani i jetës
/FEHMI KORÇA/
Rrugëtim
E harlisur është bota ime,
lulet janë vyshkur atje larg
Në pafajin e tyre.
Unë ika
t’i harroj të gjitha
t’i trokas një porte tjetër,
e t’i them:
-Mirëmëngjesi jetë!
E di,
në çdo skutë kujtimi më ndjekë
Stinët që ikin e vijnë
diku të përcjellin diell
…të thanë murlani diku.
Plaga të katandisë, lum miku,
të përplasë si deti,
por jo…
Çdo fillim ka një mbarim,
kur njëra dell mbyllet,
tjetra hapet sërish!
Nga e para do të trokas,
e do të thërras:
-Mirëmëngjesi jetë, në dheun
tim!
