Në fshatin Budrikë të Epërme të Vitisë nisin punimet për ndërtimin e Zonës Ekonomike me statusin „Park Industrial”
Kryetari i Komunës së Vitisë, Sokol Haliti dhe Bajram Hasani, Ministër i Tregtisë dhe Industrisë kanë përuruar sot fillimin e punimeve për ndërtimin e Zonës Ekonomike, me statusin “Park Industrial”.
Ky projekt parasheh rregullimin e një sipërfaqe prej 15. 5 hektarë në fshatin Budrikë e Epërme, konkretisht për gjatë rrugës magjistrale Ferizaj-Gjilan. Kurse aty parashihet të hapen edhe veprimtari të ndryshme ekonomike dhe me këtë projekt parashihet edhe ulja e papunësisë në këtë komunë.
Sokol Haliti, Kryetari i Komunës së Vitisë, në ceremoninë e fillimit të këtyre punimeve ndër tjerash potencoi se kjo është faza e parë e investimit nga MTI dhe shtoj se shumë investitorë vendor dhe të huaj janë të interesuar të hapin bizneset e tyre në këtë zonë.
“Ky investim është më i prituri nga vitiasit, kjo zonë ekonomike do të i shërbej jo vetëm Vitisë por edhe tërë regjionit dhe shtatë komunave të Anamoravës pasi është pozicionuar në një pikë strategjike dhe zhvillimore”, u shpreh Haliti.
Kurse Bajram Hasani, Ministër i Tregtisë dhe Industrisë të Republikës së Kosovës, ndër tjerash shtoj se niveli qendror do të përkrah bizneset në fuqizimin e tyre.
“Kjo zonë është e rëndësishme për Vitinë, Anamoravën dhe është një zonë që mund ata shfrytëzojnë të gjitha bizneset. Kjo qeveri do të përkrah bizneset në fuqizimin e tyre, sektorin e prodhimit, është vendim që kemi marrë për heqjen e të gjitha barrierave të linjave të prodhimit dhe do të fuqizojmë të gjitha zonat ekonomike në vend”, tha Ministri Hasani.
Përndryshe me projektin e zonës Ekonomike, me statusin “Park Industrial” parashihet rregullimi i një sipërfaqe prej 15. 5 hektarë në fshatin Budrikë e Epërme, konkretisht për gjatë rrugës magjistrale Ferizaj-Gjilan.
Kurse aty parashihet të hapen edhe veprimtari të ndryshme ekonomike dhe me këtë projekt parashihet edhe ulja e papunësisë në këtë komunë. Më pas Ministri Hasani dhe përfaqësues të institucioneve komunale të Vitisë, ka vizituar edhe fabrikën për prodhimin e styroporit “ Daka Therm” në Pozheran, Fabrikën “Elektro Stubëlla” në Stubëll si dhe Fabrikën “Eurofisi” në Radivojcë të Vitisë.
