Qendra Kombëtare për Njohje është paditur nga një profesor që për më shumë se 18 muaj nuk ka marrë përgjigje për mosnostrifikimin e diplomës së doktoraturës, të fituar në Universitetin e Tiranës.
Shefket Jakupi, nga Konçuli i Komunës së Bujanoci, thotë se është shkelur Udhëzimi administrativ për njohjen e gradave të fituara jashtë vendit, derisa në Ministrinë e Arsimit thonë se pavarësisht rekomandimit të ekspertëve për njohje të diplomës, një gjë e tillë nuk mund të bëhet pa njohjen edhe të diplomave paraprake, raporton Titulli.com.
Në përgjigjen e MASHT-it për këtë rast theksohet se komisioni profesional i ekspertëve ka rekomanduar njohjen e gradës.
Gjithashtu është bërë e ditur se Këshilli Kombëtar për Njohje, në mbledhjen e para tre javëve, ka marrë qëndrim që për lëndët e ngjashme të organizojnë një takim në formë punëtorie për të marrë një vendim përfundimtar.
“Tani për here të fundit po ju drejtohem që në mbledhjen e së hënës të nxirret një vendim , që të më mundësohet ti kërkoj drejtat e mia përmes drejtësisë. Të njetën diplomë e kamë të nostrifikuar në Serbi për 33 ditë, e në Kosovë 555 ende pa përgjigje”, thuhet në reagimin e profesorit Shefket Jakupi.
Ai mëtej thekson se në bazë të mendimit të dhënë nga Komisioni i ekspertëve, Komisioni Kombëtar për Njohje do të vendosë për ose kundër njohjes së dokumentit.
“Në bazë të këtij udhëzimi Komisioni Kombëtar për njohje, duhet të nxjerr vendim mbi njohjen e gradës shkencore “Doktor”, data e aplikimit ka qenë në bazë të kërkesës nr.7574 të dates 30.12.2013 njohjen e gradës shkencore “DOKTOR” (dr.sc) të lëshuar nga: Universiteti Bujqësor i Tiranës (UBT) – Universitet Publik – Fakulteti i Ekonomisë dhe Agrobiznesit, Kamëz-Tiranë, Departamenti: Financë-Kontabilitet. Por fatëkeqësishtë ata mbajnë në heshtje këtë çështje pa përgjigje me shkrimë deri në këtë moment, shkruan Jakupi.
Lidhur me këtë rast ai i është drejtuar edhe Avokatit të Popullit në Kosovë, Hilmi Jashari, i cili ka shqyrtuar ankesën e palës, duke e vlerësuar si të pranueshme ankesën për të vazhduar hetimet eventuale për shkelje të të drejtave të njeriut.
http://titulli.com/index.php?m=post&s=15454
