Në Ministrinë e Mbrojtjes sot është shënuar Dita e Ashkalinjve dhe 21 vjetori i Ditës së Flamurit kombëtar të tyre, ku ministri i Mbrojtjes, Ejup Maqedonci, ka organizuar pritje zyrtare për ushtarakët e FSK-së nga komuniteti ashkali.
Gjithashtu, në këtë ceremoni morën pjesë zëvendësministri i Mbrojtjes, Adnan Rexhepllar, zëvendëskomandanti i FSK-së, gjeneralmajor Enver Cikaqi, zëvendësministri i Ministrisë së Industrisë Ndërmarrësisë dhe Tregtisë, Resul Makreshi, drejtori i Ekipit Këshillues dhe Ndërlidhës të NATO-s (NALT), gjeneralbrigade Ralf Hammerstein, dhe kryetari i Partisë së Ashkalinjve për Integrim, Hetem Arifi.
Ministri Maqedonci, në fjalën e tij theksoi se komuniteti ashkali ka dëshmuar me kontributin e tyre në ndërtimin e Kosovës dhe se ky komunitet, i cili tradicionalisht ka shërbyer në Ushtrinë e Kosovës, ka përcjellë shembullin më të mirë të integrimit.
“Këtë vit radhëve të FSK-së i janë shtuar edhe katër pjesëtarë të rinj nga komuniteti juaj. Nga të gjitha komunitetet, ashkalinjtë kishin numrin më të madh të aplikuesve, kjo tregon edhe për atdhedashurinë që ka ky komunitet ndaj Kosovës dhe dëshirën për të shërbyer në uniformën e ushtrisë së Kosovës”, tha ministri Maqedonci.
Ndërsa, zëvendëskomandanti i FSK-së, gjeneralmajor Enver Cikaqi, pjestëravë të pranishëm të komunitetit ashkali i uroi festën e tyre kombëtare duke pohuar se ky komunitet ka dhënë një kontribut të jashtëzakonshëm në shtetndërtimin e Kosovës dhe FSK-së në veçanti.
Po ashtu, drejtori i NALT, gjeneralbrigade Ralf Hammerstein, i uroi festën kombetare të gjithë pjestëarëve të FSK-së nga komuniteti ashkali, me ç’rast theksoi se NATO ofron përkrahjen në rritjen e përfaqësimit të komuniteteve joshumicë në organizatat e sigurisë në vend, në veçanti në FSK.
Në vazhdim të kësaj ceremonie, këshilltari i ministrit të Mbrojtjes, Asllan Kryeziu, shprehu falënderim për këtë organizim duke theksuar se pjesëtarët e këtij komuniteti, shërbejnë me nderë dhe krenari në Ushtrinë e vendit tonë, për të mirën e përbashkët të të gjithë qytetarëve.
Forca e Sigurisë së Kosovës, është Ushtri profesionale dhe multietnike e cila përbëhet nga shtetasit e saj pa dallim të përkatësisë etnike. /2LONLINE/
