“Bazuar në të dhënat statistikore të cilat i posedojmë ndër kundërvajtjet të cilat e cenojnë sigurinë rrugore janë edhe mos përdorimi i brezit të sigurisë nga vozitësit e automjeteve dhe pasagjerët e tyre. Kjo paraqet një rrezikshmëri të theksuar me rastin e aksidenteve të trafikut”, ka thënë Ismet Hashani, zëdhënës i Policisë së Kosovës (PK), në Drejtorinë Rajonale në Gjilan
Sipas zëdhënësit Hashani, Policia e Kosovës në Rajonin e Gjilanit nga 08 mars deri me 15 mars 2021 është në zbatim e sipër planin Operativ “përdorimi i rripit të sigurisë”, me qëllim të ngritjes së sigurisë për drejtuesit e automjeteve dhe pasagjerët e tyre në aspektin preventiv, vetëdijesimin e tyre për rëndësinë që ka përdorimi i brezit të sigurisë gjatë drejtimit të automjetit dhe pasojat që lindin nga mos përdorimi i brezit të sigurisë në rastet e aksidenteve të trafikut.
“Policia e Kosovës, përveç planifikimeve vjetore dhe ato në bashkëpunim me institucionet vendore, ka vlerësuar që të bashkëngjitemi me aktivitetet që zhvillohen në kuadër të “ROADPOL” (European Roads Policing Network – Rrjeti Evropian i Policive Rrugore), të vihet në fokus me masat për “Rripin e Sigurisë”, ku ky aktivitet do të implementohet në të gjithë Evropën”, ka thënë tutje Hashani.
Sipas tij, këto aktivitete do të ndërmerren nga të gjitha njësitë e trafikut dhe stacionet policore në kuadër të PK-së, në nivel Rajonal duke ju bashkangjitur aktiviteteve do të zhvillohet në të gjithë vendin.
Qëllim i vetëm është parandalimi i aksidenteve rrugore dhe rritja e sigurisë në rrugët e vendit, pa dallim.
“Mos vendosja e rripit të sigurisë mund të rrisë shumë rrezikun e një lëndimi serioz gjatë një përplasjeje në aksident trafiku dhe mund të jetë përgjegjëse për shumë vdekje në rrugë.
Policia e Kosovës është e vendosur për krijimin e një ambienti të qetë dhe të sigurt për të gjithë”, ka thënë zëdhënësi i PK-së, Ismet Hashani. /2LONLINE.com/
