Kryetari i Komunës së Vitisë, Sokol Haliti, ka pritur sot në takim kryetarin e komunës së Likovës së Maqedonisë së Veriut, Erkan Arifin.
Temë e këtij takimi ishte bashkëpunimi ndërinstitucional i të dyja komunave, si dhe shqyrtimi i mundësive për realizim të projekteve të përbashkëta që kanë për qëllim mirëqenien e qytetarëve të komunës së Vitisë dhe atyre të Likovës.
Haliti, ka njoftuar kryetarin Arifi për projektet që janë realizuar në komunën tonë deri më tani, si edhe për ato që janë në realizim e sipër. Ndër tjerash, foli edhe për projektin Ndërkufitar të Bashkimit Evropian “Cross Border” që Vitia është pjesë përbërëse dhe mbi projektet qe dëshiron të realizojë në kuadër të projekteve të Komisionit Evropian.
Kryetari Haliti mes tjerash vlerësoi bashkëpunimin e mirë mes dy komunave duke potencuar se vazhdimi i këtij bashkëpunimi është në interes të qytetarëve të Vitisë dhe Likovës.
Ndërsa, kryetari i Likovës, Erkan Arifi, ka përgëzuar kryetarin Haliti për punën e mirë që është duke e bërë, si në projektet infrastrukturore, po ashtu edhe për atë të mbështetjes me projekte në sektorë të ndryshëm, bujqësi, shëndetësi, arsim, kulturë, etj, si dhe bëri të ditur me zhvillimet e gjithmbarshme në komunën që e drejton ai.
”Kemi një bashkëpunim të mirë me komunën e Vitisë dhe ky takim ka për qëllim që të dy komunat të aplikojmë në fonde të ndryshme bashkërisht”, tha Arifi duke përmendur edhe projektet prioritare me të cilat do të aplikoj komuna e Likovës.
Kurse kryetari Haliti, tha se komuna e Vitisë ka përvoja të mira në aplikimin e fondeve të ndryshme dhe në këtë rrafsh jemi në dijeni se në cilat fusha mund të aplikojmë bashkërisht. /2LONLINE/
