(2L ONLINE) – Kreu i Komunës së Gjilanit Lutfi Haziri thotë se ikja e qytetarëve jashtë vendit është një problem i madh, për të cilin, ai vlerëson se të gjithë kemi faj, e më së shumti politikanët, që, sipas tij, nuk bënë aq sa duhet për vendin gjatë 15 vjetëve të pasluftës.
Ja postimi i Hazirit në profilin e tij në facebook:
“Pas largimit të ‘ministrit për largim’, Kosova po ballafaqohet me një tjetër problem të madh – ikjen e qytetarëve tanë jashtë vendit për një jetë më të mirë, e mundësi më të mëdha! Është shokuese të shohësh njerëz të përlotur e të thyer duke e braktisur Kosovën! Pse po ndodhë kjo? I kujt është faji?
Dorën në zemër, të gjithë kemi faj, e më së shumti ne, politikanët, që nuk bëmë aq sa duhet për vendin tonë gjatë 15 vjetëve të pasluftës. Për ta parandaluar këtë fotografi të shëmtuar, sot Kosovës më shumë se kurrë i nevojitet uniteti kombëtar në shumë çështje.
Është koha e fundit që në këtë vend të sundoj ligji, të gjithë të trajtohen në mënyrë të barabartë para ligjit dhe askush të mos jetë ‘i paprekshëm’ kur bënë ‘gjynah’, qoftë ai politikan, biznesmen, polic, prokuror, gjykatës…Është koha e fundit që të shfrytëzohet i tërë potenciali që të zhvillohet ekonomia, duke hapur vende të reja pune, pastaj arsimi, shëndetësia e resorët tjerë.
Ose po krijojmë shtet përnime, ose po e lëmë këtë punë! LH
