“Kjo ditë në Karadak do të quhet si dita që e realizon ëndrrën tonë të përbashkët për qarkullim të lirë dhe për afrim me njëri-tjetrin”.
Kështu ka deklaruar kryetari i Gjilanit, Lutfi Haziri, në ceremoninë e hapjes së pikës kufitare Stanqiq-Bellanoc, e cila e lidh Kosovën me Maqedoninë e Veriut.
Ai ka falënderuar të gjithë ata që kanë kontribuar për këtë projekt madhështor, për të cilin tha se kanë punuar shumë që nga paslufta për të ardhur deri në këtë akt.
“Vendkalimi do të shkurtojë jashtëzakonisht shumë distancën e qarkullimit të lirë të njerëzve, e pas gjashtë muajve, edhe qarkullimin e lirë të mallrave. Ky trekëndësh kufitar, në majën e zezë, i ka bashkuar historikisht njerëzit e mirë të Malësisë së Karadakut. Por, ka qenë e pa imagjinueshme kjo ditë e bardhë, e cila ne jep mundësi që, jo vetëm për 30 minuta të shkojmë në Kumanovë dhe në korridorin e dhjetë ndërkombëtar, por tashmë Gjilani, Likova e Kumanova dhe komunat tjera deri në Krivapalanka, janë përfshirë në kuadër të projekteve të bashkëpunimit
ndërkufitar, të IPA 2. Urime, në veçanti, Karadakut”, ka shtuar kreu i Gjilanit.
Ai pohoi se do të vazhdojnë t’i rrisin kapacitetet e bashkëpunimit mes komunave të Anamoravës dhe komunave të Maqedonisë së Veriut, në të mirë të farmerëve, zejtarëve e të rinjve.
Në fund, kryetari i Gjilanit ka shfaqur besimin që në një të ardhme të afërt të nis realizimi i projektit Llojan-Miratoc, i cili do ta lehtësojë trekëndëshin kufitar.
