![Haxhiu: Programi Kombëtar për trajtimin e kryerësve të dhunës në familje dhe dhunës ndaj grave dhe vajzave do të finalizohet deri në shtator](https://2lonline.com/file/2023/05/PROGRAMI_KOMBETAR-850x560.jpg)
Ministrja e Drejtësisë, Albulena Haxhiu ka marrë pjesë në punëtorinë e parë të Grupit Punues për hartimin e Programit Kombëtar për trajtimin e kryerësve të dhunës në familje dhe dhunës ndaj grave dhe vajzave.
Në fjalën e saj, ministrja Haxhiu tha se sot po fillon hartimi i Programit të parë Nacional për kryerësit e dhunës në familje, i cili parashihet të finalizohet deri në shtator të këtij viti.
“ Hartimi i programit nuk është përfundimi i këtij procesi por tek nisja. Pas ngritjes së kapaciteteve, Ministria e Drejtësisë do ta pilotoj këtë program për të parë dhe vlerësuar zbatueshmërinë e tij në praktikë. Pilotimi do të monitorohet dhe vlerësohet në mënyrë të detajuar ashtu që, revidimet e mundshme të bëhen në program, me synimin që Programi Nacional të jetë i qëndrueshëm, më afatgjatë dhe i zbatueshëm në praktikë”, tha Haxhiu.
Ministrja Haxhiu tha se përmes këtij Programi dhe një angazhimi të plot intelektual dhe profesional, do të arrihet që të kontribuohet fuqishëm për një shoqëri pa dhunë, për jetesë me dinjitet.
Ofrimi i këtij Programi për trajtimin e kryerësve të dhunës në familje, sipas ministres Haxhiu është planifikuar dhe paraparë me Strategjinë Kombëtare për Parandalim dhe Mbrojtje ndaj Dhunës në Familje dhe Dhunës ndaj Grave 2022-2026.
Në kuadër të Strategjisë, ministrja Haxhiu tha se është miratuar edhe Kurrikula për trajnimin e profesionisteve për ofrimin e programeve për kryerësit e dhunës në familje në Republikën e Kosovës, e cila ka sjell 41 profesionistë të fushave të ndryshme, për të krijuar menjëherë mundësi që të avancojmë edhe më tej shërbimin profesional.
Ministrja Haxhiu, ka shprehur mirënjohje për ndihmën e ofruar nga përfaqësuesit e Këshillit të Evropës, GREVIO-s dhe Rrjetin Evropian për Punën me Kryerësit e Dhunës, të cilët sigurojnë se Programi do të jetë në harmoni të plotë dhe do të integrojë standardet e Konventës së Stambollit.
Qëllimi i punëtorisë është hartimi i programit për kryesit e dhunës në familje: korniza dhe ofrimi i shërbimit. /2LONLINE/